काठमाडौं, २७ भदौ । नेकपा माओवादी केन्द्रले प्रधानमन्त्री सुशीला कार्की नेतृत्व सरकारले गरेको प्रतिनिधिसभा विघटनको सिफारिसप्रति गम्भीर असहमति जनाएको छ ।

शुक्रबार पार्टी पदाधिकारीहरूको आकस्मिक बैठकपछि जानकारी दिँदै प्रवक्ता एवम् उपाध्यक्ष अग्नि प्रसाद सापकोटाले मुलुकको वर्तमान परिस्थितिलाई विश्लेषण गर्दा संसद् विघटन गर्ने निर्णय संवैधानिक व्यवस्थाविपरीत भएको निष्कर्ष पार्टीले निकालेको बताए ।

बैठकमा अध्यक्ष पुष्पकमल दाहाल ‘प्रचण्ड’ले संसद् विघटन गर्ने निर्णय मुलुकलाई थप संकटतर्फ धकेल्ने बताएका छन् ।

माओवादी केन्द्रले संविधान र लोकतान्त्रिक अभ्यासको संरक्षणका लागि संसद् कायम राख्नु अपरिहार्य रहेको उल्लेख गर्दै विघटन निर्णयविरुद्ध राजनीतिक र कानुनी संघर्ष गर्ने चेतावनी समेत दिएको छ ।