काठमाडौं, २७ भदौ । नेपालले पहिलो महिला प्रधानमन्त्री पाएको छ । शीतल निवासमा आयोजित विशेष समारोहमा राष्ट्रपति रामचन्द्र पौडेलबाट शपथ ग्रहण गर्दै सुशीला कार्की प्रधानमन्त्री बनेकी हुन् ।

युवा पुस्ता जेनजीको सशक्त आन्दोलनको पृष्ठभूमिमा नेतृत्वमा आएकी कार्कीले शपथ ग्रहण गरेलगत्तै इतिहास रच्ने निर्णय लिएकी छन् । उनको नेतृत्वमा बसेको पहिलो मन्त्रिपरिषद्को बैठकले प्रतिनिधिसभा विघटनको सिफारिस गरेको छ ।

साढे दुई वर्ष अर्थात् आधा कार्यकाल बाँकी रहेको संसद् विघटन गर्ने सिफारिस नेपालको इतिहासमा दुर्लभ घटनाका रूपमा हेरिएको छ ।

राजनीतिक वृत्तमा कार्कीको यो कदमलाई साहसिक तर विवादास्पद मानिएको छ । एकातर्फ जेनजी आन्दोलनकारीहरूले यसलाई ‘परिवर्तनको विजय’ भनेर स्वागत गरेका छन् भने अर्कोतर्फ संविधानिक अभ्यासमा यसले नयाँ बहस जन्माउने अनुमान गरिएको छ ।