सप्तरी, २६ भदौ । उच्च अदालत जनकपुर, राजविराज इजलास र सप्तरी जिल्ला अदालतमा भदौ २४ गते भएको आगलागीपछि सम्पूर्ण मुद्दा पेशी र अदालती कामकारवाही अनिश्चितकालका लागि स्थगित गरिएको छ ।

अदालत प्रशासनले जारी गरेको सूचनामा दुवै अदालत भवन पूर्णरूपमा नष्ट भएको उल्लेख छ । मिसिल, कम्प्युटर, प्रिन्टर, नेटवर्किङ उपकरण लगायतका प्रशासनिक सामग्री जलेर नष्ट भएकाले अर्को सूचना नआएसम्म नियमित कामकाज स्थगित रहने जानकारी दिइएको छ ।

अदालत प्रशासनले सेवाग्राहीहरूलाई पर्न गएको असुविधाप्रति दुःख व्यक्त गर्दै अवस्था सामान्य भएपछि मात्र कामकाज सुचारु हुने स्पष्ट पारेको छ ।

जेनजी आन्दोलनका क्रममा देशभर सार्वजनिक सम्पत्तिमा भएको तोडफोड र आगजनीकै क्रममा अदालतमा आएको क्षतिले न्यायिक प्रक्रिया नै अवरुद्ध भएको छ । यसले मुद्दा विचाराधीन रहेका सर्वसाधारणलाई थप समस्यामा पारेको र आलोचना सुरु भएको प्रशासनिक स्रोतहरूले जनाएका छन् ।

साथै, अदालतको सम्पूर्ण कागजात, कम्प्युटर डाटाबेस र नेटवर्किङ संरचना जलेर नष्ट भएपछि सेवाग्राहीले अहिले अदालतमा पहुँच पाउन असम्भव बनेको छ । प्रशासनले आगामी समयमा क्षतिको मूल्याङ्कन गरी आवश्यक मर्मत र पुनःनिर्माण सुरु गर्ने तयारी गरिरहेको जनाएको छ ।

अदालतमा भएको आगलागीले न्यायिक प्रक्रिया रोकिएको विषयमा वकिल, सामाजिक सञ्जाल र स्थानीय नागरिकले चिन्ता व्यक्त गरेका छन् । कानुनी पेशीमा रोकावटका कारण विवादास्पद मुद्दा विचाराधीन रहेका व्यक्तिहरू अझै पर्खाइमा छन् ।