महोत्तरी, २६ भदौ । जलेश्वर कारागारबाट भदौ २४ गते साँझ आन्दोलनकारीको आडमा सामूहिक रूपमा फरार भएका ५७६ कैदीमध्ये भारततर्फ भागेका १२ जनालाई भारतीय सुरक्षाकर्मीहरूले नियन्त्रणमा लिएर नेपाल प्रहरीलाई बुझाएका छन् ।

जिल्ला प्रहरी कार्यालय महोत्तरीका प्रवक्ता प्रहरी नायब उपरीक्षक शैलेन्द्र भट्टका अनुसार बिहीबार दिउँसो ९ जनालाई भिटामोड नाकामार्फत र ३ जनालाई वथनाहा नाकाबाट नेपाल प्रहरीको नियन्त्रणमा ल्याइएको हो । पक्राउ परेकामध्ये धनुषा, महोत्तरी, मकवानपुरका साथै भारतको बिहार राज्यका विभिन्न जिल्लाका बासिन्दा रहेका छन् ।

नेपालतर्फ हस्तान्तरण गरिएका कैदीमा धनुषा मुसहरिनिया–५ का रामगुलाम महतो, हंसपुर–३ का विनोद राय, जनकपुरधाम–२१ का इन्द्रेश मण्डल, शहीदनगर–३ का कृष्णकुमार महतो, महोत्तरी मटिहानी–१ का मुजाहिद अन्सारी, गौशाला–४ का सुरेन्द्र साह सोनार, जलेश्वर–१ का रेयाज दफाली, मकवानपुर हेटौंडा–३ का राजेश तामाङ, भारत बैशालीका आनन्द मोहन कुमार, सितामढीका बलबिन कुमार महतो र जियाउल रहमान, पूर्वी चम्पारणका गुड्डु कुमार यादव रहेका छन् ।

हालसम्म ५७६ मध्ये ५२ जना कैदी जलेश्वर कारागार फिर्ता भएका छन् । कारागारका निमित्त प्रमुख रविनचन्द्र ठाकुरका अनुसार ४० जना स्वेच्छाले फर्किएका छन् भने १२ जनालाई भारतीय प्रहरीले नियन्त्रणमा लिएर नेपाल पठाएको हो । ठाकुरले भने, ‘२४ घण्टे अल्टिमेटम जारी गरेपछि कैदीहरू सम्पर्कमा आउन थालेका छन् । नआएकालाई भने कानून अनुसार पक्राउ गरेर ल्याइनेछ ।’

भदौ २४ गते साँझ करिब ७ बजे आन्दोलनकारीहरूले लाठी र बाँसको भाटा बोकेर जलेश्वर कारागार कब्जामा लिएका थिए । उनीहरूले मधेश आन्दोलन २०७२ का क्रममा सशस्त्र प्रहरी सई थमन विक हत्या प्रकरणमा संलग्न पूर्व प्रदेश सांसद कौशल कुमार यादवसहित सजाय भोगिरहेका कैदीहरूको रिहाइ माग गरेका थिए ।

तर, भिड अनियन्त्रित बनेपछि कारागारको बाहिरी गेट भत्काइयो र भित्री फलामे गेटसमेत तोडियो । कैदीहरू आन्दोलनकारीसँगै उग्रिएपछि करिब सबैजना फरार भएका थिए । त्यस बेला कारागारमा ४० जना नेपाल प्रहरी र ३५ जना सशस्त्र प्रहरी खटिएका थिए । तर, बल प्रयोग गर्दा ठूलो क्षति हुन सक्ने भन्दै पछि हटेपछि कैदीहरू सहजै भाग्न सफल भएका थिए ।

सामाजिक र कानुनी दृष्टिले संवेदनशील यो घटनापछि सीमावर्ती क्षेत्रमा सुरक्षा सतर्कता उच्च बनाइएको छ । नेपाल र भारत दुवै देशका सुरक्षा निकायले निगरानी बढाए पनि फरार कैदी नियन्त्रणमा लिन चुनौतीपूर्ण भइरहेको देखिएको छ ।

विशेषतः कर्तव्य ज्यान मुद्दामा पुर्पक्षमा रहेका सुस्त मानसिक अवस्थाका कैदी दीपक कुमार यादव भने कारागारमै रहेका छन् । प्रहरी स्रोतले धेरै कैदी भारततर्फ भागेको आशंका व्यक्त गर्दै सीमा क्षेत्रमा खोजतलास अभियान तीव्र बनाइएको जानकारी दिएका छन् ।