सप्तरी, २६ भदौ । जेनजी आन्दोलनको क्रममा राजविराज कारागारबाट अघिल्लो दिन फरार भएका कैदीबन्दीमध्ये ३७ जनालाई प्रहरीले नियन्त्रणमा लिएको छ ।

सप्तरी प्रहरी कार्यालयका प्रहरी उपरीक्षक गौतमकुमार केसीका अनुसार बुधबार कारागारमा भएको आगजनी र मुख्य ढोका फुटाइदिएपछि ३९७ कैदीमध्ये २०५ जना फरार भएका थिए ।

बिहीबार साँझसम्म सप्तरीको विभिन्न स्थानबाट ३७ फरार कैदी पक्राउ परे । यसै क्रममा छिमेकी जिल्ला सुनसरीको झुम्का कारागारबाट दुई दिनअघि फरार भएका ५ जनासमेत पक्राउ परेका छन् । यसरी कुल ४२ फरार कैदी नियन्त्रणमा आएका छन् ।

राजविराज नगरपालिका वडा नं–६ स्थित कारागारबाट अझै १६८ कैदी फरार रहेका छन् । प्रहरी उपरीक्षक केसीले फरार कैदीबन्दी सिमावर्ती भारतीय बजारतर्फ भागेको अनुमानसहित सिमा क्षेत्रमा निगरानी कडा गरिएको र भारतीय प्रहरी अधिकारीहरूसँग समन्वय गरी खोजतलास अभियान तीव्र पारिएको जानकारी दिए ।

सुरक्षाकर्मीहरूले फरार कैदीको खोजतलासमा व्यापक प्रयास गरिरहेका छन् । सर्वसाधारणलाई सतर्क रहन तथा शंका लाग्ने गतिविधि प्रहरीलाई सूचित गर्न आग्रह गरिएको छ ।