रौतहट, २६ भदौ । रौतहटको गौर कारागारबाट केही कैदी फरार भएपछि जिल्लामा सुरक्षा उच्च सतर्कतामा राखिएको छ । जिल्ला प्रशासन कार्यालय रौतहटले जारी गरेको सूचनामा फरार कैदीवन्दीलाई तत्काल नजिकको प्रहरी कार्यालयमा आत्मसमर्पण गर्न आह्वान गरिएको छ ।

भदौ २४ गते गौर कारागारमा भएको तनावपूर्ण घटनाक्रमका क्रममा कैदी भाग्न सफल भएका थिए । प्रमुख जिल्ला अधिकारी विनोद कुमार खड्काले हस्ताक्षर गरेको सूचनामा फरार कैदीलाई लुकाउने, संरक्षण गर्ने वा सहयोग गर्ने व्यक्तिहरू वा समूहलाई कानुनअनुसार कडा कारबाही गरिने चेतावनी दिइएको छ । साथै, नागरिकहरूलाई शंकास्पद गतिविधि वा व्यक्तिहरू देखेमा तुरुन्त प्रहरीलाई जानकारी गराउन आग्रह गरिएको छ ।

सुरक्षाको दृष्टिकोणले जिल्ला प्रशासनले भदौ २७ गतेसम्म अत्यावश्यक सेवाबाहेकका सबै सरकारी सेवाहरू अस्थायी रूपमा बन्द गर्ने निर्णय गरेको छ । सूचनामा भनिएको छ, ‘अत्यावश्यक सेवा भने यथावत सञ्चालनमा रहनेछ, अन्य सेवाहरू अस्थायी रूपमा स्थगित गरिएको छ, त्यसैले सेवाग्राहीहरूले कार्यालयमा आउनुअघि आधिकारिक जानकारी अवलोकन गर्नुपर्नेछ ।’

जिल्लामा शान्ति र सुव्यवस्था कायम राख्न सुरक्षा निकायहरूलाई सक्रिय बनाइएको छ भने सर्वसाधारणलाई संयमित र सतर्क रहन अपिल गरिएको छ । प्रशासनका अनुसार कारागारमा उत्पन्न असामान्य परिस्थितिलाई मध्यनजर गर्दै सावधानीपूर्वक यस्तो निर्णय लिइएको हो ।