महोत्तरी, २६ भदौ । महोत्तरीको जलेश्वरस्थित बस स्ट्यान्ड नजिक रहेको ट्राफिक प्रहरी चौकीमा बिहीबार दिउँसो अज्ञात व्यक्तिहरूको समूहले आगजनी गरेको छ ।

प्रहरी उपरीक्षक हेरम्ब शर्माका अनुसार करिब १ः३० बजे केही संख्यामा आएका समूहले पेट्रोल छर्केर चौकीमा आगो लगाएका हुन् ।

आगलागीबाट चौकीमा रहेको एक कम्प्युटर, कुर्सी र टेबल पूर्णरूपमा नष्ट भएको एसपी शर्माले जानकारी दिए । घटनास्थलमा आगो फैलिन नपाएकोमा प्रहरी, सशस्त्र प्रहरी र नेपाली सेनाको संयुक्त टोलीको तत्पर प्रयासले थप क्षति हुनबाट कार्यालय जोगिएको छ ।

एसपी शर्माले भने, ‘आगलागीमा संलग्न समूहलाई चाँडै पक्राउ गर्ने उद्देश्यले सुराकी संकलन, सिसिटिभी फुटेज विश्लेषण र अन्य अनुसन्धान प्रक्रिया तिव्र गतिमा अघि बढाइएको छ ।’

जलेश्वर क्षेत्रमा पछिल्ला दिनमा कैदी फरार घटना र विरोध प्रदर्शनका कारण सुरक्षा चुनौती बढ्दै गएको बताइएको छ । प्रहरीले यस आगजनीलाई नियोजित र शंकास्पद गतिविधिको रूपमा लिएको छ र सार्वजनिक सुरक्षाका दृष्टिले आवश्यक सबै कदम उठाइरहेको जनाएको छ ।