जनकपुरधाम, २६ भदौ । संविधानको रक्षा र लोकतान्त्रिक प्रणालीको सुदृढीकरणको मागसहित नेपाली कांग्रेस निकट नेपाल विद्यार्थी संघ र तरुण दलका युवाहरूले जनकपुरधामको मुख्य सडकमा प्रदर्शन गरेका छन् ।

विरोध प्रदर्शनमा सहभागी युवाहरूले ‘संविधानको रक्षा गरौं, लोकतन्त्र बचाऔं’, ‘राष्ट्रपतिको सम्बोधन सार्वजनिक होस्’ जस्ता नाराहरू लगाउँदै उपमहानगरपालिका क्षेत्रभित्र र्‍याली निकाले ।

कांग्रेस नेता प्रवेश चौधरीले प्रदर्शनको क्रममा संविधानलाई कमजोर बनाउने कुनै पनि प्रयास नेपाली जनताले स्वीकार नगर्ने बताए । उनले भने, ‘हामी शान्तिपूर्ण तर दृढ संघर्षमा छौं । राष्ट्रपति राष्ट्रको संरक्षक हुन् । उनलाई निष्पक्ष ढंगले बोल्ने अवसर दिनुपर्छ ।’

तरुण दलका प्रतिनिधिहरूले मुलुक हाल संवैधानिक संकटतर्फ धकेलिँदै गएकोमा चिन्ता व्यक्त गर्दै राजनीतिक दलहरूलाई जिम्मेवार बन्न आग्रह गरेका छन् । उनीहरूले राष्ट्रपति संस्थालाई केवल औपचारिक नभई सक्रिय र कार्यकारी भूमिकामा प्रस्तुत गराउनुपर्नेमा जोड दिएका छन् ।

सडकमा प्रदर्शनमा उत्रिएका युवाहरूले संविधानको १० वर्षे यात्रालाई ऐतिहासिक उपलब्धि बताउँदै यसलाई धरापमा पार्ने कुनै पनि गतिविधि स्वीकार नहुने चेतावनी दिएका छन् ।