जनकपुरधाम, २६ भदौ । मधेश प्रदेशको राजधानी जनकपुरधाममा बिहीबार बिहानदेखि स्थिति क्रमशः सामान्य बन्दै गएको छ ।

गत मङ्गलबार जेनजी आन्दोलनका नाममा भएको हिंसात्मक प्रदर्शन, तोडफोड र आगजनीले मधेश प्रदेशको राजधानी जनकपुरधामलाई अस्तव्यस्त बनाएको थियो । आन्दोलनको प्रभावका कारण जनजीवन ठप्प भएको थियो भने बजार पूर्ण रूपमा बन्द थिए । तर, बिहीबार बिहानदेखि जनकपुरधामको अवस्था क्रमशः सामान्य बन्दै गएको हो ।

छिटफुट रुपमा बजार खुलेका छन् भने मुख्य सडकहरूमा मानिसहरूको चहलपहल र सवारीसाधनको आवागमन पनि बढ्न थालेको छ । स्थानीय युवाहरूले नगर क्षेत्रमा तोडफोड र आगजनीबाट उत्पन्न फोहोर सफा गर्ने काम थालेका छन् ।

नेपाल सेनाको नेतृत्वमा तीन तहकै सुरक्षा गस्ती रातिदेखि सक्रिय भएपछि जनकपुरधामको अवस्था नियन्त्रणमा आएको हो । मङ्गलबार रातिदेखि सुरक्षा गस्ती सक्रिय भए पनि प्रदर्शनकारीले शहरका सरकारी कार्यालय र निजी संस्थामा व्यापक तोडफोड र आगजनी गरेका थिए ।

आन्दोलनकारीहरूले मधेश प्रदेश सभा भवन, मुख्यमन्त्री कार्यालय, भौतिक पूर्वाधार मन्त्रालय, भूमि व्यवस्था, कृषि तथा सहकारी मन्त्रालय, शिक्षा तथा संस्कृति मन्त्रालय, मुख्य न्यायाधिवक्ताको कार्यालय, जिल्ला प्रशासन कार्यालय धनुषा, जनकपुरधाम उपमहानगरपालिका प्रशासनिक भवन, तिनकौरियास्थित विदेह नगरपालिका, जिरोमाइलस्थित ट्राफिक कार्यालय, जनकपुरधाम–८ का वडा कार्यालयसहितका सरकारी संरचनामा तोडफोड र आगजनी गरेका थिए । प्रारम्भिक आकलनअनुसार यसबाट अर्बौं रुपैयाँको क्षति भएको अनुमान गरिएको छ ।

यस्तै, आन्दोलनकारीहरूले नेपाली कांग्रेस जिल्ला र प्रदेश कार्यालयमा समेत तोडफोड र आगजनी गरेका छन् । यसक्रममा कांग्रेस नेता तथा प्रतिनिधि सभा सदस्य विमलेन्द्र निधि, कृष्ण यादव, एमाले नेता र प्रतिनिधि सभा सदस्य रघुवीर महासेठ, प्रदेश सभा सदस्य रामअशिष यादव, प्रदेशका उर्जा, सिँचाइ तथा खानेपानी मन्त्री शेषनारायण यादव, एमालेका निलम्बित प्रदेश सांसद दीपेन्द्र ठाकुरको घरमा पनि आगजनी भएको छ ।

दैनिक सेवामा संलग्न संघीय, प्रदेश तथा स्थानीय निकायका कार्यालयहरूमा कम्प्युटर, इन्टरनेट सेवा, फाइल र आधिकारिक कागजातहरूमा आगलागी तथा तोडफोड भएको छ । धनुषाका प्रमुख जिल्ला अधिकारी शङ्करहरि आचार्यले भने, ‘कर्मचारीहरू कार्यालय पुग्दा पनि काम गर्न असक्षम छन् । अधिकांश कार्यालयहरू जलेर कालो भएका, फर्निचर क्षतिग्रस्त भएका, कार्यकक्षका कम्प्युटर र दराजसहित कार्यालयका सवारीसाधन पनि आगोले नष्ट भएका छन् ।’

प्रमुख जिल्ला अधिकारी आचार्यका अनुसार प्रदर्शनका क्रममा जनकपुरधाममा एक दर्जनभन्दा बढी कार्यालय प्रभावित भएका छन् । कार्यालयहरूमा आधिकारिक डकुमेन्ट उपलब्ध नभएकाले सेवा पुनः सञ्चालन कहिलेबाट सुरु गर्न सकिन्छ भन्ने स्पष्ट छैन । यसका कारण सेवाग्राहीहरू थप असुविधामा परेका छन् ।

जिल्ला प्रहरी कार्यालय धनुषाले क्षतिको विवरण सङ्कलन गरिरहेको भए पनि सार्वजनिक गर्न अझै समय लाग्ने जनाएको छ । स्थानीय प्रशासनले अहिले स्थिति नियन्त्रणमा रहेको बताउँदै आवश्यक सुधार र सुरक्षा उपायहरू लागू भइरहेको जानकारी दिएको छ ।

स्थानीय नागरिक र व्यापार व्यवसायीले भने, ‘आन्दोलनका कारण हाम्रो दैनिकी ठप्प भएको छ । बजार बन्द र सरकारी सेवा नचल्दा जनजीवन गम्भीर रूपमा प्रभावित भएको छ ।’ उनीहरूले प्रशासनलाई शीघ्र प्रभावित क्षेत्रको पुनःनिर्माण र सेवा सुचारु गर्न आग्रह गरेका छन् ।