जनकपुरधाम, २५ भदौ । बम काण्डमा दोषी ठहर भई जेल सजाय भोगिरहेका संजय साहको जनकपुरधामस्थित घरमा हाल राजनीतिक चहलपहल बढेको छ । जेलबाट निस्किएका साहलाई भेट्न र बधाई दिन उनका शुभचिन्तक र स्थानीय नागरिकहरू घरमै पुगेका छन् ।

सञ्जय साह हाल कुनै राजनीतिक पार्टीमा आबद्ध नभए पनि जनकपुरमा उनका लागि सम्मानको वातावरण बनेको छ । उनले आफू जेलबाट निस्कन नचाहेको बताउँदै भनेका छन्, ‘मेरो जेल भुक्तानीको समय पूरा हुन लागेको थियो । २–४ महिनाभित्र म निस्कने थिएँ, मलाई कुनै हतार थिएन । तर, युवाहरूले जबर्जस्ती निकालेका हुन् ।’

उनले आफ्नो जेलबाट भागेर नआएको दाबी गर्दै भने, ‘यदि सरकारले मलाई फेरि जेल फर्किन भनेको खण्डमा म तयार छु । म जेलबाट भागेको होइन, जेनजीका युवा र प्रशासनको अनुरोध अनुसार आएको हुँ ।’

संजय साहले आफू राजनीति प्राणी भए पनि अहिले तत्काल राजनीतिमा नअन्तर्न आउने स्पष्ट पारेका छन् । उनले भने, ‘मैले राजनीति गर्नेछु । तर, अहिले होइन । साथीभाइसँग सल्लाह गरेर मात्रै राजनीतिक कदम चाल्ने छु । यदि राजनीतिमा आउँछु भने सेवाभावका लागि मात्र आउँछु ।’