जनकपुरधाम, २५ भदौ । मधेश प्रदेशका तीनवटा कारागार तोडफोड र आगजनीसँगै ९८३ कैदीबन्दी फरार भएका छन् । सप्तरी, महोत्तरी र रौतहटका कारागारबाट ठूलो संख्यामा कैदी भागेपछि स्थानीयमा त्रास फैलिएको छ भने सीमावर्ती क्षेत्रमा सुरक्षाकर्मीको उपस्थिति थप कडा पारिएको छ ।

सप्तरीको राजविराजस्थित कारागारबाट मंगलबार दिउँसो करिब १ बजे २०५ जना कैदी फरार भए । प्रहरीहरू आगलागी निभाउन खटिएको मौका छोपी कैदीहरू भागेका हुन् । सप्तरीका प्रमुख जिल्ला अधिकारी टुवराज पोखरेलका अनुसार भागेकामध्ये ३१ जनालाई पुनः नियन्त्रणमा लिइएको छ भने बाँकी भारततर्फ भागेको आशंका गरिएको छ ।

महोत्तरीको जलेश्वर कारागारबाट मंगलबार साँझ ५७६ जना कैदी एकैपटक भागेका छन् । मधेश आन्दोलनको क्रममा सशस्त्र प्रहरी सई थमन विक हत्या प्रकरणमा रहेका ६ कैदीलाई आन्दोलनकारीले छुटाउन खोज्दा परिस्थिती नियन्त्रणबाहिर गएपछि सम्पूर्ण कैदी फरार भएका थिए ।

रौतहटको गौर कारागारमा रहेका २९१ कैदीमध्ये २४ बाहेक सबै २६७ जना भागेका थिए । अहिले ३४ जनालाई नियन्त्रणमा लिएर फर्काइएको भए पनि अझै २३३ जना कैदी फरार रहेको प्रशासनले जनाएको छ ।

सर्लाहीको मलंगवा कारागारमा विवादित धर्मगुरु रामबहादुर बम्जन रहेका कारण ठूलो भिड जम्मा भएको थियो । उनका समर्थकहरूले आगजनी गरेर भाग्न खोजेपनि प्रहरी, सशस्त्र प्रहरी र सेनाको संयुक्त टोलीले नियन्त्रणमा लिन सफल भयो । सो क्रममा कयौं राउण्ड हवाई फायर र अश्रुग्यास प्रहार गरिएको थियो ।

वीरगंज कारागारमा पनि भाग्ने प्रयास भएको थियो । तर, नेपाली सेनाले गोली चलाएर कैदी फरार हुनबाट रोक्यो । पर्साका प्रमुख जिल्ला अधिकारी तोयनारायण सुवेदीका अनुसार अहिले अवस्था सामान्य भए पनि तनाव अझै कायमै छ ।

फरार कैदीहरू मध्ये धेरैजना खुला सीमा प्रयोग गरी भारत भागेको आशंका गरिएको छ । यसका लागि सीमावर्ती क्षेत्रमा सुरक्षा बल परिचालन गरिएको छ । सिरहा कारागार भने अहिलेसम्म शान्त रहेको प्रशासनले जनाएको छ ।

ठूलो संख्यामा कैदी फरार भएपछि स्थानीय बासिन्दामा भयत्रास बढेको छ । प्रहरी, सशस्त्र प्रहरी र नेपाली सेनाले संयुक्त रूपमा फरार कैदीको खोजी अभियान तीव्र पारेका छन् । प्रशासनले आमनागरिकलाई होसियारी अपनाउन र शंकास्पद गतिविधि देखे तत्काल सूचना दिन आग्रह गरेको छ ।