काठमाडौं, २५ भदौ । भ्रष्टाचारविरुद्धको अभियानबाट सडकमा उत्रिएका जेनजी युवाहरूको आन्दोलन अब आन्तरिक विभाजनमा पुगेको छ ।

बुधबार नेपाली सेनाको मुख्यालय जंगीअड्डामा वार्ताका लागि पुगेका जेनजी प्रतिनिधिहरू गणतन्त्रलाई सुधार्ने कि राजतन्त्र फर्काउने भन्ने विषयमा दुई ध्रुवमा विभाजित भएका हुन् ।

सैनिक स्रोतका अनुसार १५ जनाभन्दा बढीको संख्यामा सेनाको मुख्यालय प्रवेश गरेका प्रतिनिधिलाई सेनापति अशोकराज सिग्देलले धेरैजना एकैपटक वार्तामा बस्दा कठिनाइ हुने भन्दै पहिले एकमत बनाएर संयोजक तोकी आउन सुझाव दिएका थिए । तर, जंगीअड्डाभित्रै बसेर छलफल सुरु गर्दा प्रतिनिधिहरूबीच तीव्र मतभेद देखा परेको हो ।

छलफलमै भाग लिएर बाहिरिएकी रक्षा बमले पत्रकारसँग भनिन्, ‘आन्दोलनको न्यूनतम मर्मविरुद्ध छलफल अघि बढाइयो । त्यसैले म र केही साथीहरू बाहिरिन बाध्य भयौं ।’ स्रोतका अनुसार उनको संकेत राजतन्त्र पुनःस्थापना गर्ने प्रस्तावतर्फ थियो ।

छलफलमा सहभागी एक पक्षले संघीयता र धर्मनिरपेक्षता खारेज गर्दै राजतन्त्र फर्काउनुपर्ने प्रस्ताव राखेका थिए । अर्को पक्षले भने यो आन्दोलन व्यवस्था बदल्न होइन, सुधार गर्न हो भन्दै गणतन्त्रलाई नै मजबुत बनाउनुपर्ने धारणा राख्यो । ‘हामीले गणतन्त्रको विकल्प खोजेका होइनौं । यही व्यवस्थाभित्र सुधार गरेर अगाडि बढ्नुपर्छ,’ एक जेनजी युवाले भने ।

त्यसक्रममा गणतन्त्र पक्षधर युवाहरूले शहीद परिवार, आन्दोलनमा घाइते र प्रभावितलाई प्राथमिकता दिनेगरी स्वतन्त्र व्यक्तित्वको नेतृत्वमा नागरिक सरकार गठन हुनुपर्ने माग गरेका थिए । तर, केही संख्यामा रहेका जेनजी सदस्यले अहिलेको संसद् नै बाटो खोल्नुपर्ने प्रस्ताव गरे पनि बहुमतले अस्वीकार गरेको स्रोतको भनाइ छ ।

नेपाली सेनाका उच्च अधिकारीहरूले आफूहरू समस्याको समाधानकर्ताभन्दा सहजीकरणकर्ताको भूमिकामा मात्र रहने स्पष्ट पारेका छन् । सेनाको भनाइअनुसार अन्ततः जेनजी प्रतिनिधिहरू एकमत बनाएर मात्र राष्ट्रपतिसँग संवाद हुनेछ ।

यसैबीच, सैनिक स्रोतले रास्वपा र व्यवसायी दुर्गा प्रसाईंलाई पनि वार्ताको दायरामा राख्ने तयारी भएको खुलासा गरेको छ । ‘यी दुई पक्षलाई बाहिर राख्दा भोलि फेरि समस्या हुनसक्ने भएकाले कुनै न कुनै रुपमा उहाँहरूको कुरा पनि सुन्नुपर्ने देखिन्छ,’ स्रोतले भन्यो ।

आन्दोलनको क्रममा सोमबार मात्रै प्रहरीले अत्यधिक बल प्रयोग गर्दा २१ जनाको ज्यान गएको थियो भने करिब २०० जना घाइते भएका थिए । मंगलबार कफ्र्यूबीच संसद् भवनमा आगजनी भएपछि प्रदर्शनकारी सिंहदरबार, सर्वोच्च अदालतलगायतका संवैधानिक निकायमा समेत पुगेका थिए ।

युवाहरूको आक्रोश चर्कँदा सरकारले फेसबुक, एक्ससहित २५ वटा सामाजिक सञ्जाल बन्द गरेको थियो । तर, प्रतिबन्धले झन् असन्तुष्टि बढाउँदै सडकमा ‘नेपोनेभिज’ अभियानलाई उग्र बनाएको हो ।

काठमाडौं महानगर प्रमुख बालेन शाहले समेत मंगलबार सामाजिक सञ्जालमार्फत आह्वान गर्दै ‘अब तपाईंको पुस्ताले नै देशको नेतृत्व गर्नुपर्नेछ, तयार रहनुहोुस्’ भनेका थिए । त्यसपछि राष्ट्रपति कार्यालयले जेनजीलाई संवादमा आउन औपचारिक आह्वान गरेको थियो ।

तर, नेतृत्वविहीन आन्दोलनमा आफूलाई प्रतिनिधि दाबी गर्ने समूह बढ्दै जाँदा वार्तामा सहभागी संख्यामा पनि विवाद बढेको छ । यही कारणले अहिले जेनजी आन्दोलन गणतन्त्रको सुधार र राजतन्त्र पुनःस्थापनाको बहसमा विभाजित देखिएको छ ।