काठमाडौं, २५ भदौ । देशभर उत्पन्न विषम परिस्थितिलाई मध्यनजर गर्दै नेपाल पत्रकार महासंघले सम्पूर्ण पत्रकार र सञ्चार संस्थालाई सुरक्षामा विशेष ध्यान दिन आग्रह गरेको छ । महासंघ केन्द्रीय समितिले बुधबार जारी गरेको सर्कुलरमार्फत पत्रकारहरूले पेसागत दायित्व निर्वाह गर्दा भौतिक सुरक्षालाई सर्वोच्च प्राथमिकता दिनुपर्ने आवश्यकता औंल्याएको हो ।

महासंघका महासचिव रामप्रसाद दाहालले जारी गरेको सर्कुलरमा भनिएको छ, ‘जनतालाई सुसूचित गर्ने दायित्व पूरा गर्ने क्रममा कहींकतैबाट अवरोध नहोस् भन्नेमा सचेत रहनु आवश्यक छ । निषेधाज्ञा जारी भएको क्षेत्र वा कफ्र्यूको समयमा रिपोर्टिङका लागि खटिँदा अनिवार्य रूपमा परिचयपत्र बोक्नुपर्छ, सम्भव भए प्रेस लेखिएको ज्याकेट लगाउनुपर्छ र समूहमा रहेर मात्र काम गर्नुपर्छ ।’

साथै महासंघले सुरक्षालाई हल्का रूपमा नलिन आग्रह गर्दै सम्भावित जोखिमलाई ध्यानमा राखेर पत्रकारहरूले सुरक्षाका उपायहरू अपनाउनुपर्नेमा जोड दिएको छ । ‘आफ्नो सुरक्षालाई पहिलो प्राथमिकतामा राखेर मात्र पेशागत धर्म निर्वाह गर्नुपर्ने परिस्थिति छ,’ सर्कुलरमा उल्लेख छ ।

महासंघले यस्ता कठिन घडीमा पत्रकारमाथि हुने धम्की, त्रास, आक्रमण वा समाचार संप्रेषणमा अवरोध भए तत्काल केन्द्रीय कार्यालयमा जानकारी गराउन पनि आग्रह गरेको छ ।

हालै बढ्दो प्रदर्शन, तोडफोड र सुरक्षात्मक अवस्थाबीच पत्रकारहरूको पेशागत गतिविधिमा अवरोध हुने खतरा बढेपछि महासंघले सम्पूर्ण शाखा, प्रतिष्ठान र एसोसियट संस्थालाई पनि सचेत रहन निर्देशन दिएको हो ।

यसअघि पनि विभिन्न आन्दोलन र अस्थिरताका समयमा पत्रकारहरू आक्रमणको लक्ष्य बन्ने गरेका छन् । त्यसैले महासंघले यसपटक समयमै सचेतना जारी गर्दै पत्रकारको जीवन र पेशागत स्वतन्त्रता दुवैलाई सुरक्षित राख्न सबै सरोकारवालासँग सहयोगको अपेक्षा गरेको छ ।