हेटौंडा, २५ भदौ । हेटौंडा उपमहानगरपालिका–११ स्थित बालसुधार गृह फोडेर ५८ जना बालबन्दी फरार भएका छन् । मंगलबार दिउँसो करिब साढे ३ बजे संरचना तोडफोड गर्दै उनीहरू भागेका हुन् ।

बालसुधार गृहका प्रमुख प्रदीप गौतमका अनुसार घटना हुँदा सुधार गृहमा ९४ जना बालकहरू बस्दै आएका थिए । प्रारम्भिक विवरणअनुसार ७२ जना भागे पनि १३ जनालाई प्रहरीले नियन्त्रणमा लिएर फर्काएको छ भने १ जना आफैं फर्किएको छ । हाल २२ जना सुधार गृहमै रहेका र ५८ जना अझै फरार रहेको पुष्टि भएको गौतमले बताए ।

फरार बालबन्दीको खोजीका लागि प्रहरी परिचालन गरिएको छ । गौतमका अनुसार घटनापछि सुधार गृहको गेट बाहिर आएका अभिभावकहरूले ढुंगामुढा गरेका थिए । बाहिरी आक्रमणपछि भित्र रहेका बालबन्दीहरूले संरचना भत्काएर समूहगत रूपमा भागेको प्रारम्भिक निष्कर्ष सुधार गृहले निकालेको छ ।