काठमाडौं, २५ भदौ । जेनजी आन्दोलनका क्रममा भएको तोडफोड र आगजनीपछि देशभरका कारागारहरूबाट ठूलो संख्यामा कैदीबन्दी फरार भएका छन् ।

नेपाल प्रहरीका केन्द्रीय प्रवक्ता तथा डीआईजी विनोद घिमिरेका अनुसार हालसम्म १३ हजार ५७२ कैदीबन्दी कारागार तोडी फरार भएका छन् ।

यसबाहेक विभिन्न मुद्दामा अनुसन्धानका लागि हिरासतमा रहेका ५६० जना थुनुवा समेत भागेको प्रहरीले पुष्टि गरेको छ । मंगलबारको हिंसात्मक प्रदर्शनपछि देशभरका कारागार र प्रहरी हिरासत केन्द्रमा आक्रमण हुँदा यस्तो स्थिति सिर्जना भएको हो ।

फरार कैदीबन्दीमध्ये कति गम्भीर अपराधमा सजाय पाएका थिए भन्नेबारे विवरण संकलन भइरहेको प्रहरीले जनाएको छ । यस्तै, फरार थुनुवा र कैदीबन्दीको खोजी कार्यलाई तीव्र बनाइएको प्रवक्ता घिमिरेले जानकारी दिए ।

राजधानीसहित विभिन्न शहरमा अझै तनावपूर्ण अवस्था कायम रहेको छ । सुरक्षा निकायले सर्वसाधारणलाई सतर्क रहन र सहयोग गर्न आह्वान गरेको छ ।