काठमाडौं, २५ भदौ । जेनजी आन्दोलनका क्रममा ज्यान गुमाउने प्रहरीको संख्या तीन पुगेको छ । यसअघि दुई प्रहरीको मृत्यु भएको पुष्टि भए पनि पछिल्लो तथ्याङ्कअनुसार एक असईसहित तीन जनाको मृत्यु भएको नेपाल प्रहरीले जनाएको छ ।

नेपाल प्रहरीका केन्द्रीय प्रवक्ता तथा डीआईजी विनोद घिमिरेका अनुसार मृतक सबै प्रहरी वृत्त महाराजगञ्जमा कार्यरत थिए । उनीहरूको परिचय समेत पुष्टि भइसकेको र शव परीक्षण तथा अन्तिम संस्कारका प्रक्रिया अघि बढाइएको बताइएको छ ।

तर, झडपमा सहभागी केही प्रहरी अझै सम्पर्कविहीन रहेकाले मृत्यु हुनेको संख्या बढ्न सक्ने आशंका गरिएको छ । आन्दोलनका क्रममा दर्जनौं प्रहरी घाइते भएको र विभिन्न अस्पतालमा उपचाररत रहेको प्रहरीले जानकारी दिएको छ ।

सडकमा चर्किएको तनावपछि राजधानीको सुरक्षालाई कडा बनाइएको छ । सुरक्षा निकायले सर्वसाधारणलाई शान्त रहन र अफवाहमा नफस्न आग्रह गरेको छ ।