जनकपुरधाम, २५ भदौ । पूर्वराज्यमन्त्री तथा संविधानसभा सदस्य रहिसकेका संजयकुमार साह नख्खु कारागारबाट बाहिरिएका छन् । जेनजीको उग्र रुपसँगै रास्वपा सभापति रवि लामिछानेसहित कैदीबन्दी जेल बाहिर निस्किएपछि साह पनि मंगलबार नख्खु जेलबाट बाहिरिएका हुन् ।

साहले १२ वर्षअघि जन्मकैदको सजाय भोग्न नख्खु जेल प्रवेश गरेका थिए । मधेश राजनीतिमा सक्रिय साह २०६४ सालमा तत्कालीन मधेशी जनअधिकार फोरमबाट समानुपातिक तर्फबाट संविधानसभा सदस्य बनेका थिए । पछि उनी सद्भावना पार्टीतर्फबाट पनि संविधानसभा सदस्य निर्वाचित भएका थिए ।

साहमाथि २०६९ साल वैशाख १८ गते जनकपुरको रामानन्द चौकमा भएको बम विस्फोट घटनामा संलग्न रहेको अभियोग छ । उक्त विस्फोटमा पाँच जनाको ज्यान गएको थियो । सो घटनाको मुख्य योजनाकारका रुपमा उनीमाथि मुद्दा चलाइएको थियो ।

त्यस्तै, जनकपुरकै सञ्चार उद्यमी अरुण सिंहानियाको हत्या प्रकरणमा पनि साहलाई योजनाकारका रुपमा अभियोग लगाइएको थियो । यी दुई चर्चित प्रकरणमा दोषी ठहर भई उनले १२ वर्षदेखि जेलजीवन व्यतित गरेका थिए ।

जेलबाट निस्किएलगत्तै साहले सामाजिक सञ्जालमार्फत आफ्नो धारणा सार्वजनिक गरेका छन् । आफूविरुद्ध लगाइएका आरोपलाई अस्वीकार गर्दै उनले आफू निर्दोष रहेको दाबी गरेका छन् ।

‘दलको आडमा न्यायाधीशहरूले निर्दोषलाई दोषी र दोषीलाई निर्दोष सावित गरेर जेल हाल्ने गरेका छन् । म पनि त्यसैको सिकार भएको छु,’ साहले भनेका छन् । उनले जेनजी आन्दोलनको प्रशंसा गर्दै परिवर्तनका पक्षमा जनताको उठानलाई ऐतिहासिक भनेका छन् ।