इटहरी, २३ भदौ । सुनसरी जिल्लामा सोमबार दिउँसोदेखि इटहरी उपमहानगरपालिकाको केही क्षेत्रलाई लक्षित गरी अनिश्चितकालीन कर्फ्यू आदेश जारी गरिएको छ ।

जिल्ला प्रशासन कार्यालय सुनसरीले स्थानीय प्रशासन ऐन, २०२८ को दफा ६(३क) बमोजिम कर्फ्यू आदेश जारी गरेको हो ।

प्रमुख जिल्ला अधिकारी धर्मेन्द्र कुमार मिश्रले दिउँसो ३ः३० बजेदेखि अर्को सूचना नभएसम्म लागू हुने गरी कर्फ्यू आदेश लागू गरिएको जनाएका छन् ।

कर्फ्यू आदेश जारी गरिएको क्षेत्रमा कसैलाई पनि हिँडडुल गर्न, भेला हुन, जुलुस निकाल्न, प्रदर्शन गर्न, सभा वा बैठक गर्न तथा कुनै किसिमको घेराउ गर्न निषेध गरिएको छ । आदेश उल्लंघन गर्नेहरूलाई कानुनअनुसार कारबाही गरिने जिल्ला प्रशासन कार्यालयले चेतावनी दिएको छ ।

कर्फ्यू आदेश तोकिएको चारकिल्ला भित्र मात्रै लागू हुने जनाइएको छ ।
उत्तर : हलगडा नेपाली सेनाको ब्यारेकदेखि पारुहाङ चोकसम्म
पूर्व : मिलन चौकदेखि जुट विकास क्षेत्रसम्म
दक्षिण : अख्तियार दुरुपयोग अनुसन्धान आयोगको कार्यालय दक्षिण, यातायात कार्यालय, साथी पेट्रोल पम्प, पुष्पलाल चौक हुँदै बस पार्क क्षेत्रसम्म
पश्चिम : कलङ्की मोडदेखि जनता बस्तीभित्र

कर्फ्यू आदेशलाई कार्यान्वयन गर्नका लागि इटहरीका मुख्य सडक तथा संवेदनशील क्षेत्रमा ठूलो संख्यामा सुरक्षाकर्मी परिचालन गरिएको छ । स्थानीय प्रशासनले शान्ति–सुरक्षा कायम गर्न नागरिकलाई आदेश पालना गर्न आग्रह गरेको छ ।