महोत्तरी, २२ भदौ । महोत्तरीको बर्दिबास नगरपालिका–१२ स्थित जनता माध्यमिक विद्यालय डाँडाटोलमा कक्षा ६ मा अध्ययनरत १३ वर्षीय गौतम पासवान गत बिहीबार विद्यालय पढ्न हिँडेका थिए । तर, आजसम्म उनी घर फर्केका छैनन् ।

बालक गौतमको बेपत्ता हुने समाचारले परिवारलाई चिन्तित बनाएको छ । उनका काका प्रमोद पासवानका अनुसार गौतम साइकलमा घरबाट विद्यालय गएका थिए । विद्यालय पुग्ने बेलासम्म उनी घर फर्केका छैनन् । चार दिन भइसकेको छ । तर, अझै उनको कुनै खबर पाएका छैनौं ।

बालक बेपत्ता भएपछि परिवारले प्रहरी चौकी हात्तीलेटमा निवेदन दिएका छन् । निवेदन प्राप्त भएपछि इलाका प्रहरी कार्यालय बर्दिबासका प्रमुख एवम् प्रहरी नायब उपरीक्षक प्रकाश बमले तत्काल सक्रिय प्रहरी टोली परिचालन गरिएको जानकारी दिए । उनले भने, ‘परिवारबाट प्राप्त निवेदनपछि बालक गौतमको खोजतलासमा प्रहरी टोली सक्रिय छ । आसपासका क्षेत्र र सम्भावित मार्गहरूको छानबिन भइरहेको छ ।’

प्रहरीले स्थानीयवासी, साथीहरू र विद्यालयका शिक्षकहरूसँग समेत सम्पर्क गरी बालक कहाँ गएका हुन सक्ने सम्भावित स्थानहरूको जानकारी संकलन गरिरहेको जनाएको छ ।

प्रहरीका अनुसार बालकको खोजी कार्यमा साइकल मार्ग, नजिकैको खोलानाला, जंगल र खेत वरिपरि समेत खोजी भइरहेको छ । इलाका प्रहरीले समुदायसँग समन्वय गर्दै बालक भेट्टाउने सम्भावना उच्च बनाउने रणनीति अपनाएको जनाएको छ ।