बारा, २२ भदौ । बाराको जीतपुरसिमरा उपमहानगरपालिका–४ सिमरामा आइतबार बिहान बाघको आक्रमणबाट एक व्यक्तिको मृत्यु भएको छ । मृतक ५८ वर्षीय छेवाङ लामा जीतपुरसिमरा–१ का बासिन्दा रहेका छन् ।

इलाका प्रहरी कार्यालय सिमराका प्रहरी नायब उपरीक्षक वेदप्रकाश जोशीका अनुसार लामा बिहान करिब ७ बजे प्रगतिशील सामुदायिक वनतर्फ च्याउ टिप्न गएका थिए । त्यही बेला बाघले आक्रमण गर्दा उनी गम्भीर घाइते भएका थिए । घटनास्थलमा रहेका अन्य स्थानीयले मृतकलाई घटनास्थलमै मृत अवस्थामा देखेपछि प्रहरीलाई खबर गरेका थिए ।

प्रहरी टोली घटनास्थल पुगेपछि आवश्यक कारबाही गरेको थियो । मृतकको शव पोस्टमार्टमका लागि प्रादेशिक अस्पताल कलैया पठाइएको प्रहरीले जनाएको छ ।

बारा जिल्लामा केही महिनाअघि मात्र अम्लेखगञ्ज क्षेत्रमा बाघको आक्रमणबाट तीन जनाको ज्यान गएको थियो । लगातार बढिरहेका घटनाले स्थानीयवासीमा त्रास उत्पन्न गरेको छ ।

घटनापछि सम्बन्धित निकाय बाघ नियन्त्रणमा सक्रिय भएका छन् । पर्सा राष्ट्रिय निकुञ्ज, डिभिजन वन कार्यालय बारा, चितवनबाट आएका प्राविधिक टोलीसँगै राष्ट्रिय प्रकृति संरक्षण कोष, जैविक विविधता संरक्षण केन्द्र, नेपाल प्रहरी र नेपाली सेनाको संयुक्त टोली परिचालन गरिएको छ ।

डीएसपी जोशीका अनुसार बाघलाई नियन्त्रणमा लिन हात्तीको सहयोगमा खोजी भइरहेको छ । उनले भने, ‘डार्टमार्फत बेहोस पारेर नियन्त्रणमा लिने तयारी भइरहेको छ ।’

स्थानीयवासीले लगातार बढिरहेको बाघ आतङ्कप्रति चिन्ता व्यक्त गर्दै निकुञ्ज र सम्बन्धित निकायसँग मानव बस्ती नजिक बाघको गतिविधि नियन्त्रण गर्न आग्रह गरेका छन् । उनीहरूले वन क्षेत्र आसपास सुरक्षाकर्मीको गस्ती बढाउन र तत्काल दीर्घकालीन समाधानको पहल गर्न माग गरेका छन् ।