जनकपुरधाम, २२ भदौ । मधेश प्रदेशका कार्यवाहक मुख्यमन्त्री एवम् भौतिक पूर्वाधार विकास मन्त्री सरोज कुमार यादवले कर्मचारी र जनप्रतिनिधि दुवै जनताप्रति उत्तरदायी भएर काम गर्नुपर्नेमा जोड दिएका छन् ।

आइतबार जनकपुरधाममा निजामती सेवा दिवस २०८२ को अवसरमा गृह सञ्चार तथा कानून मन्त्रालयद्वारा आयोजित कार्यक्रममा मुख्यमन्त्री यादवले यस्तो निर्देशन दिएका हुन् ।

कार्यवाहक मुख्यमन्त्री यादवले भने, ‘कर्मचारी र जनप्रतिनिधि एउटै रथमा सवार यात्री हौं । विकास र समृद्धिका लागि जनप्रतिनिधि जति जिम्मेवार हुन्छन्, त्यति नै कर्मचारी पनि जिम्मेवार हुनुपर्छ ।’ उनले इमान्दारिता र निष्ठापूर्वक काम गर्ने कर्मचारीलाई राज्यले सम्मान गर्ने व्यवस्था लागू गरिने जानकारी दिए ।

यस्तै, यादवले भविष्यमा उत्कृष्ट काम गर्ने कर्मचारीको फोटो कार्यालयमा झुण्ड्याउने व्यवस्था गर्न आग्रह गर्दै यसले अन्य कर्मचारीहरूलाई पनि इमान्दार र उत्तरदायी काम गर्ने प्रेरणा दिने बताए ।

कार्यवाहक मुख्यमन्त्री यादवले मौजुदा ऐन तथा कानूनको कार्यान्वयनमा जोड दिँदै कर्मचारी र प्रशासनमा उत्तरदायित्व, पारदर्शिता र निष्ठाको प्रवृत्ति बढाउन निर्देशन दिएका छन् । उनले भने, ‘शासन प्रणालीमा इमान्दार र उत्तरदायी कर्मचारीको भूमिका विकास र समृद्धि हासिल गर्ने प्रमुख आधार हो । यसले प्रदेश सरकारको कार्यसम्पादनमा विश्वास कायम राख्नेछ ।’

कार्यक्रममा नेपाल राष्ट्रिय कर्मचारी संगठन निजामति धनुषाका अध्यक्ष मुनेश्वर यादवले विभिन्न श्रेणीका कर्मचारीहरूको योग्यता अनुसार स्थायी नियुक्ति, सम्मान र पारदर्शिता सुनिश्चित गर्न सरकारसँग माग राखेका थिए । उनले विगत वर्षदेखि काम गरिरहेका इमान्दार कर्मचारीको पुरस्कृत र सम्मान गर्नुपर्ने, साथै संघ–प्रदेशबाट प्राप्त सुविधा अनुसार अवकाश पाउने व्यवस्था सुनिश्चित गर्नुपर्ने आवश्यकता औँल्याए ।

कार्यक्रम मधेश प्रदेशका प्रमुख सचिव मदन भुजेलको अध्यक्षतामा सम्पन्न भएको थियो । कार्यक्रममा गृह सञ्चार तथा कानून मन्त्रालयका सचिव विमल बराल, धनुषाका प्रमुख जिल्ला अधिकारी शंकर हरि आर्चाय, मन्त्रालयका शाखा अधिकृत राधे शंकर पाल र विभिन्न ट्रेड युनियनका नेताहरूले पनि आ–आफ्नो मन्तव्य राखेका थिए ।

कार्यक्रम अघि बिहान ‘व्यवसायिक र सिर्जनशील प्रशासनः विकास, समृद्धि र सुशासन’ नारा लेखिएको व्यानरसहित प्रभातफेरी र र्याली आयोजना गरिएको थियो । र्यालीमा चारवटै सुरक्षा निकायका अधिकारी, विभिन्न कार्यालयका कर्मचारी र मधेश प्रदेशका विभिन्न मन्त्रालयका उच्च ओहदाका कर्मचारीहरूले सहभागिता जनाएका थिए ।