सर्लाही, २२ भदौ । जिल्ला प्रशासन कार्यालय सर्लाहीले आइतबार गोडैता र कबिलासीका घर पुगेर एक जना अशक्त र एक वृद्ध दम्पत्तिलाई नागरिकता प्रदान गरेको छ । प्रशासनले घरमै सेवा पुर्याएर सेवाग्राहीको पहुँच सहज बनाएको कार्यक्रममा स्थानीय र प्रशासनिक अधिकारीहरू उपस्थित थिए ।

गोडैता नगरपालिका–५ रामवन निवासी ८१ वर्षीय फरमूद मिया र उनकी ७९ वर्षीया पत्नी ऐसा खातुनलाई प्रथम प्रतिलिपी प्रदान गरिएको थियो । त्यस्तै, कबिलासी नगरपालिका–७ जमुनियाकी ७३ वर्षीया सैरुल खातुन फकिरलाई दोस्रो प्रतिलिपी प्रदान गरिएको छ ।

जिल्ला प्रशासन कार्यालय सर्लाहीका कम्प्युटर अपरेटर मुकेश यादवका अनुसार नागरिकता हस्तान्तरण कार्यक्रममार्फत वृद्ध र अशक्त सेवाग्राहीलाई घरमै सेवा पुर्याएर सहजता सुनिश्चित गरिएको हो ।

कार्यक्रममा प्रमुख जिल्ला अधिकारी तुलसीबहादुर श्रेष्ठ, सहायक प्रमुख जिल्ला अधिकारी शिवहरि पोखरेल, गोडैता नगरपालिकाका प्रमुख देवेन्द्र यादव र कबिलासी नगरपालिकाका प्रमुख ब्रह्मदेव रायसहितका स्थानीय जनप्रतिनिधि उपस्थित थिए ।

नागरिकता पाउँदा वृद्ध–अशक्त सेवाग्राहीहरू अत्यन्तै खुशी भएका थिए । फरमूद मिया र उनकी पत्नीले भनिन्, ‘अब हामीले नागरिक अधिकार प्रयोग गर्न सक्ने भएकाले राहत महसुस भएको छ ।’ शारीरिक रूपमा अशक्त सैरुल खातुनले पनि घरमै सेवा पाउँदा सहज महसुस भएको बताइन् ।

गोडैता नगरपालिकाका प्रमुख देवेन्द्र यादवले प्रशासनिक सेवाहरू सदैव सहज र सेवाग्राहीमैत्री हुनुपर्नेमा जोड दिँदै भने, ‘घरमै सेवा पुर्याउँदा नागरिकले सेवा सजिलै पाउँछन् र प्रशासनप्रति विश्वास बढ्छ ।’

प्रमुख जिल्ला अधिकारी तुलसीबहादुर श्रेष्ठले भने, ‘भर्खरै नयाँ भवनबाट सेवा प्रवाह सुरु भएको जिल्ला प्रशासन कार्यालयले अब नागरिकता लगायतका सेवा अझ सहज, द्रुत र पहुँचयोग्य बनाउन अग्रसर रहेको छ । हामीले सेवा प्रवाहको गुणस्तरमा सुधार गर्दै घरमै सेवा पुर्याउने कार्यक्रमलाई निरन्तरता दिनेछौं ।’