जनकपुरधाम, २२ भदनै । भदौ महिनाको कृष्णपक्ष प्रतिपदा तिथिबाट शुरु हुने सोह्र श्राद्ध अघि आइतबार मिथिला क्षेत्रसहित तराई–मधेशका विभिन्न जिल्लामा ऋषि तर्पण विधिपूर्वक सम्पन्न गरिएको छ । हिन्दू परम्परा अनुसार पितृ तर्पण शुरु हुनु अघि देवता तुल्य ऋषिमुनिको स्मरणमा तर्पण गर्ने चलन रहिआएको छ ।

जनकपुरधामस्थित ऐतिहासिक र धार्मिक स्थल गंगासागरमा बिहानैदेखि भक्तजनहरूको घुइँचो लागेको थियो । टाढाटाढाबाट आएका हजारौं श्रद्धालुहरूले ऋषिमुनिको नाम स्मरण गर्दै काँक्रो, खरको फूल र शंखले तर्पण अर्पण गरे। गंगासागर मात्रै नभई धनुषसागर, विहारगुण्ड, अग्निकुण्ड र दुग्धमति तलाउमा समेत बिहानैदेखि तर्पण गर्ने श्रद्धालुको ठूलो भिड लागेको थियो ।

जनकपुरधामका पण्डित शोभाकान्त झाले ऋषि तर्पणको धार्मिक महत्वबारे जानकारी दिँदै भने, ‘पितृ श्राद्ध शुरु हुनु अघिल्लो दिन ऋषि र देवताको स्मरण गरी तर्पण गर्ने परम्परा शास्त्रसम्मत मानिन्छ । यसमा काँक्रो, खरको फूल र शंख अनिवार्य अर्पण गर्ने मान्यता छ ।’

श्राद्ध पर्व हिन्दू संस्कृतिमा विशेष महत्व राख्छ । भदौ कृष्णपक्ष प्रतिपदा तिथिबाट शुरु भई सोह्र दिनसम्म चल्ने यस पर्वमा विशेषगरी बुबा गुमाएका सन्तानले पितृप्रति श्रद्धाभाव प्रकट गर्दै तर्पण अर्पण गर्ने चलन रहेको छ ।

सोमबारदेखि औपचारिक रूपमा पितृ तर्पण शुरु हुने भएकाले मिथिलाञ्चलका धार्मिक स्थलहरूमा अझै ठूलो संख्यामा श्रद्धालुहरूको आगमन हुने विश्वास गरिएको छ ।