काठमाडौँ, १९ भदौ । नेपाल सरकारको निर्देशनअनुसार देशभरका इन्टरनेट सेवा प्रदायकहरूले फेसबुकसहितका सामाजिक सञ्जाल प्लेटफर्म बन्द गर्न सुरु गरेका छन् ।

यस क्रममा इन्टरनेट सेवा प्रदायक कम्पनी वल्र्डलिंकले बिहीबारदेखि आफ्नो आईपी एड्रेसबाट फेसबुक चल्न बन्द गरेको छ ।

वल्र्डलिंकका प्रमुख कार्यकारी अधिकृत केशव नेपालले सरकारको निर्देशन अनुसार सामाजिक सञ्जाल बन्द गरिएको पुष्टि गरेका छन् । उनका अनुसार फेसबुकबाहेक अन्य दर्ता नभइ सञ्चालनमा रहेका प्लेटफर्महरू पनि क्रमिक रूपमा बन्द गरिनेछ ।

यसैबीच नेपाल टेलिकमले पनि दर्ता नभइ सञ्चालन भइरहेका सामाजिक सञ्जाल प्लेटफर्महरू बन्द गरेको जनाएको छ । टेलिकमले जारी गरेको सूचनामा भनिएको छ, ‘नेपाल दूरसञ्चार प्राधिकरणको पत्र (मिति २०८२/०५/१९, च.नं. ५९७) र सर्वोच्च अदालतको आदेश, नेपाल सरकार मन्त्रिपरिषदको निर्णय तथा सञ्चार तथा सूचना प्रविधि मन्त्रालयको मन्त्रिस्तरीय बैठकको निर्णय र सामाजिक सञ्जालको प्रयोग व्यवस्थित गर्ने निर्देशिका, २०८० अनुसार दर्ता नभएका प्लेटफर्महरू निष्क्रिय गरिएको छ । पुनः सञ्चालन प्राधिकरणबाट प्राप्त हुने निर्देशन अनुसार हुनेछ ।’

इन्टरनेट सेवा प्रदायक संघका अध्यक्ष सुधिर पराजुलीले भने, ‘सरकारको निर्देशन अनुसार सामाजिक सञ्जाल बन्द गर्ने प्रक्रिया सुरु भइसकेको छ । क्रमशः सबै इन्टरनेट प्रदायकहरूले यसलाई लागू गर्नेछन् ।’

सरकारले यसअघि २६ वटा सामाजिक सञ्जाल प्लेटफर्म बन्द गर्ने निर्णय गरेको थियो । यस सूचीमा फेसबुक, फेसबुक मेसेन्जर, इन्स्टाग्राम, युट्युब, ह्वाट्सएप, एक्स (ट्विटर), लिंक्डइन, स्न्यापच्याट, रेडिट, डिस्कोर्ड, पिन्टेरेस्ट, सिग्नल, थ्रेड्स, वीच्याट, क्वोरा, टम्बलर, क्लबहाउस, मास्टोडन, रुम्बल, मीभी, भीके, लाइन, इमो, जालो र हाम्रो पात्रोलाई समावेश गरिएको छ ।

एनसेलले पनि आफ्ना प्रयोगकर्ताहरूलाई सूचना दिँदै दर्ता नभइ सञ्चालनमा रहेका फेसबुकसहितका सामाजिक सञ्जाल प्लेटफर्म बन्द गरिएको जानकारी गराएको छ ।

यस निर्णयले डिजिटल अभिव्यक्ति स्वतन्त्रता र सूचना प्रवाहमा असर पर्न सक्ने कतिपयले बताउँछन् । यद्यपि सामाजिक सञ्जालको दर्ता र नियमन नहुँदा अपठनीय सामग्री फैलिन सक्ने भएकाले सुरक्षा र व्यवस्थापनका लागि यो कदम आवश्यक रहेको सरकारको तर्क छ ।