पर्सा, १९ भदौ । खानेपानी मन्त्री प्रदीप यादवलाई फोनमा धम्की दिएको आरोपमा पक्राउ परेकी टिकटकर किरण साहलाई पर्सा जिल्ला अदालतले धरौटीमा छाड्ने आदेश दिएको छ ।

न्यायाधीश कमलकान्त जोशीको इजलाशले कलैया उपमहानगरपालिका–२६ सिस्वा महेशपुर स्थायी घर भएकी र वीरगंज–१३ मुर्लीमा बसोबास गर्ने साहलाई ५ हजार रुपैयाँ धरौटीमा छाड्न अनुमति दिएको जानकारी पर्सा जिल्ला अदालतका सूचना अधिकारी रामनरेश महतोले दिएका छन् ।

मन्त्री यादवका स्वकीय सचिव हरिन्द्र साहको जाहेरी दरखास्तको आधारमा टिकटकर साहलाई गत शनिबार नियन्त्रणमा लिएर अनुसन्धान थालिएको थियो । जिल्ला प्रहरी कार्यालय पर्साले विद्युतीय कारोबारसम्बन्धी कसुर लगायतको मुद्दाको फाइल सरकारी वकिल कार्यालयमा बुझाएपछि बिहीबार पर्सा जिल्ला अदालतमा थुनछेक बहस भएको थियो ।

किरण साहको तर्फबाट अधिवक्ताहरु विनोद कुमार मल्लिक, राकेश मल्लिक र अजय स्वर्णकारले बहस गरेका थिए । यसैबीच, साहसँगै रौतहटका पत्रकार अभिमन्नु पटेलमाथि पनि सरकारी वकिलको कार्यालयले अदालतमा अभियोग पत्र दर्ता गरेको छ ।

अदालतले साहलाई धरौटीमा छाड्दा अनुसन्धान जारी रहने र आगामी सुनुवाइमा उनलाई उपस्थित गराइने व्यवस्था गरेको छ ।