जनकपुरधाम, १९ भदौ । मधेश प्रदेश सरकारले मुस्लिम समुदायको महान् पर्व मोहम्मद जयन्तीको अवसरमा शुक्रबार प्रदेशभर सार्वजनिक बिदा दिएको छ ।

प्रदेश सरकारको गृह, सञ्चार तथा कानून मन्त्रालयका सचिव बिमल प्रसाद बरालद्वारा बिहीबार जारी सूचनामा शुक्रबार सम्पूर्ण प्रदेशमा बिदा रहने जानकारी दिइएको छ ।

सूचनामा २०८१ चैत्र २२ गते प्रकाशित राजपत्रमा तोकिएका अतिरिक्त सार्वजनिक बिदा व्यवस्थाअनुसार मोहम्मद जयन्तीको अवसरमा बिदा दिन निर्णय गरिएको उल्लेख छ ।

प्रदेश सरकारले यसअघि पनि धार्मिक र सांस्कृतिक विविधतालाई सम्मान गर्ने उद्देश्यसहित विभिन्न पर्वमा सार्वजनिक बिदा दिने परम्परा कायम गर्दै आएको छ ।