सप्तरी, १९ भदौ । राष्ट्रिय मुक्ति पार्टी नेपालका अध्यक्ष राजेन्द्र महतोले अशोक राई नेतृत्वको जनता समाजवादी पार्टीसँग एकता गर्ने उद्देश्यले कार्यगत एकता सुरु गरिएको जानकारी दिएका छन् ।

बिहीबार राजविराजमा आयोजित पत्रकार सम्मेलनमा नेता महतोले यस कदमको औचित्य स्पष्ट गर्दै भने, ‘छुटिएर काम गर्दा कमजोर हुने भएकाले अब एकिकृत भएर शसक्त ढंगले अघि बढ्न कार्यगत एकता गरिएको हो । यसबाट मात्र आफूहरूले थालेको मुक्तिका आन्दोलन निष्कर्षमा पुर्याउन सम्भव छ ।’

महतोले निकट भविष्यमा जनता समाजवादी पार्टीसँग पूर्ण एकता हुने संकेतसमेत दिए । उनले मधेशी, आदिवासी, जनजाती, दलित लगायत सम्पूर्ण उत्पीडित वर्गको अधिकार र पहिचान स्थापनाका लागि एकिकृत आन्दोलन अपरिहार्य रहेको उल्लेख गरे । यसै उद्देश्यका लागि संघीय लोकतान्त्रिक मोर्चा गठन गरिएको पनि उनले स्पष्ट पारे ।

पत्रकार सम्मेलनमा महतोले शासक वर्गले मधेशी लगायत उत्पीडित वर्गलाई अधिकार दिन नचाहेको आरोप लगाउँदै भने, ‘अधिकारबिनाको संघीयताको कुनै अर्थ हुँदैन । अहिले यस्तै अवस्था छ ।’

जनमत पार्टी मोर्चाबाट अलग भएको विषयमा प्रश्न गर्दा उनले भने, ‘अलग हुनु भन्दा पनि जनमत पार्टी मोर्चाबाट भागेको अवस्था हो । शासक वर्गलाई नै मजबुत तुल्याउने षडयन्त्रका कारण र कसैको इशारामा जनमत पार्टी अध्यक्ष डा. सिके राउतले रुपन्देही–३ मा छुट्टै उम्मेदवारी दिन लागेका हुन् ।’

महतोले थपे, ‘मधेशी अनुहारले मात्र मधेशको हिमायती हुँदैन । डा. राउतको गतिविधिले यसमा आशंका पैदा गरेको छ । बाँकी कुरा आगामी दिनहरूमा प्रष्ट हुने छ ।’

पत्रकार सम्मेलनमा राष्ट्रिय मुक्ति पार्टीका महासचिव केशव झा, सन्तोष मेहता, सहमहासचिव गजेन्द्र कुमार मण्डल, जिल्ला अध्यक्ष दिपेन्द्र चौधरी लगायतको पनि उपस्थित रहेको थियो ।