महोत्तरी, १९ भदौ । मधेश प्रदेश स्तरीय किशोर–किशोरी भेला २०८२ बिहीबार बर्दिबासमा सम्पन्न भएको छ । कार्यक्रम राष्ट्रिय किशोर सञ्जाल र राष्ट्रिय किशोरी सञ्जालको संयुक्त आयोजनामा, सिविन नेपाल र गल्र्स नट ब्राइड संस्थाको संयोजन तथा सेभ द चिल्ड्रेनको सहयोगमा आयोजना गरिएको थियो ।

कार्यक्रम राष्ट्रिय किशोरी सञ्जालकी महासचिव कृतिका धितालको अध्यक्षता र मधेश प्रदेशका खेलकुद तथा समाज कल्याण मन्त्री प्रमोद जयसवालको प्रमुख आतिथ्यतामा सम्पन्न भएको थियो । कार्यक्रममा सिविन नेपालका अध्यक्ष माधव प्रधान, एनआइआरएन नेपालकी अध्यक्ष निरजिना भट्ट, राष्ट्रिय किशोर सञ्जालका केन्द्रीय सदस्य राजन दास लगायतका सरोकारवालाहरू उपस्थित थिए ।

मन्त्री जयसवालले मधेश प्रदेशमा विद्यमान असमानता, जातीय विभेद, बालविवाह र छिट्टै हुने विवाह जस्ता समस्याको समाधानका लागि संघीय, प्रदेश र स्थानीय सरकारसँगै नागरिक समाजबीच सहकार्य अपरिहार्य रहेको बताए ।

उनले प्रदेशले पहिलोपटक बालिका संरक्षण ऐन, नीति र बालिका कोष सञ्चालन गरी बालिका सशक्तिकरणमा प्राथमिकता दिएको जानकारीसमेत दिए । यस वर्षको बजेटमा पर्याप्त स्रोत विनियोजन गरिएको र दहेज प्रथा, बालविवाह तथा छिट्टै हुने विवाह न्यूनीकरणका लागि सामूहिक विवाह कार्यक्रम नीतिगत रूपमा समावेश गरिएको उनले उल्लेख गरे ।

भेलामा दुई दिनसम्म साइबर सुरक्षा, यौन तथा प्रजनन स्वास्थ्य, बालविवाह र बालश्रम अन्त्यका उपायबारे छलफल गरिएको थियो । साथै, मधेस प्रदेशका आठ जिल्लाका समस्या र चुनौतीहरूको प्रदर्शन समेत गरिएको थियो ।

कार्यक्रममा सहभागी किशोर–किशोरीहरूले तयार पारेको १२ बुँदे अपिल पत्र मन्त्री जयसवाललाई हस्तान्तरण गरेका थिए । आयोजकका अनुसार भेलामा मधेश प्रदेशका आठ जिल्लाका ५० जना किशोर–किशोरी सहभागी थिए ।