सुनसरी, ५ भदौ । सुनसरीको इटहरी उपमहानगरपालिका वडा नम्बर–७ गडीघाट चौकमा आजदेखि बिहीबारे हटिया सुरु भएको छ ।

गडीघाट बजार व्यवस्थापन समितिको आयोजना र वडा नम्बर–७ को सहयोगमा सुरु भएको हटियाको उद्घाटन विशेष कार्यक्रमका बिच आज सम्पन्न भएको हो ।

उद्घाटन समारोहमा प्रमुख अतिथिका रुपमा उपस्थित इटहरी–७ का वडाध्यक्ष देवनारायण चौधरीले गडीघाट चौकमा व्यवस्थित बजार सञ्चालनले स्थानीय किसान, व्यापारी तथा सर्वसाधारणलाई सुविधा पुग्ने विश्वास व्यक्त गरे । उनले बजार सञ्चालनले स्थानीय उत्पादनको खपत बढ्ने र स्थानीय अर्थतन्त्रलाई टेवा पुग्ने बताए ।

त्यसैगरी, कार्यक्रममा पूर्व वडाध्यक्ष नरबहादुर राईले गडीघाट क्षेत्रलाई व्यवस्थित व्यापारिक केन्द्र बनाउन सबै पक्ष एकजुट हुनुपर्नेमा जोड दिए । उनले बजारलाई किनमेलको थलो मात्र नभई सामाजिक र सांस्कृतिक भेटघाटको केन्द्र बनाउनुपर्ने धारणा राखे ।

वडा सदस्य नेत्रबहादुर गुरागाँइले बजार सञ्चालनलाई पारदर्शी, अनुशासित र प्रभावकारी बनाउन बजार व्यवस्थापन समितिको भूमिकालाई महत्व दिए । उनले उपभोक्तालाई ठगिने अवस्थाबाट जोगाउन अनुगमनको व्यवस्था हुनुपर्नेमा जोड दिए ।

लक्ष्मी माध्यमिक विद्यालयका प्रधानाध्यापक प्रभु नारायण चौधरीले शिक्षा र बजारबीचको सम्बन्धबारे धारणा राख्दै स्थानीय बजारले विद्यार्थीलाई उद्यमशीलता सिक्न अवसर दिने उल्लेख गरे ।

त्यस्तै, नेपाली कांग्रेसका सभापति हेमा चौधरी, नेकपा एमालेका अध्यक्ष जितेन्द्र रम्तेल, नेकपा माओवादी केन्द्रका प्रतिनिधि विशाल कठेत, सेकरेट हार्ट स्कुलका सहायक प्रधानाध्यापक अग्नी प्रसाद न्यौपाने, पूर्व वडाध्यक्ष शिव नारायण भण्डारीलगायतका अतिथिहरुले पनि आ–आफ्ना मन्तव्य राखेका थिए ।

कार्यक्रममा गडीघाट बजार व्यवस्थापन समितिका संयोजक कृष्ण बहादुर कार्कीले अध्यक्षता गरेका थिए भने कार्यक्रमको सञ्चालन समितिका सचिव जय नारायण चौधरीले गरेका थिए ।

बजारमा तरकारी, फलफूल, माछामासु, लत्ताकपडा, भाँडाकुडा लगायत दैनिक उपभोग्य सामग्री उपलब्ध हुनेछन् । बजार व्यवस्थापन समितिले प्रत्येक बिहीबार नियमित रुपमा हटिया सञ्चालन गर्ने जानकारी दिएको छ ।