काठमाडौं, २४ साउन । नेपाल प्रिमियर लिग (एनपीएल) क्रिकेटको दोस्रो संस्करणका लागि शनिबार काठमाडौंमा सम्पन्न खेलाडी अक्सनमा कुल १६४ खेलाडीको सूची रहेकोमा ३७ खेलाडी अनुबन्ध भएका छन् ।

विभिन्न टोलीहरूले आफ्नो आवश्यकता र रणनीतिको आधारमा खेलाडीहरू अनुबन्ध गरी टिमको रूपरेखा तयार पारेका छन् । विदेशी खेलाडीहरूको छनोट अझै बाँकी रहेको छ भने घरेलु टोलीहरू आन्तरिक रूपमा बलियो बनाउन लागिपरेका छन् ।

जनकपुर बोल्ट्स
जनकपुरले अक्सनअघि अघिल्लो सिजनका मार्की र कप्तान दुवैसहित ७ खेलाडीलाई रिटेन गरेको थियो । मार्की खेलाडी आसिफ शेख, कप्तान अनिल साह, शुभ कंसाकार, किशोर महतो, ललित राजवंशी, तुलबहादुर थापामगर र रुपेश सिंह जनकपुरको स्थायी खेलाडी छन् । अक्सनबाट सचिन भट्ट, आदित्य महता, मयन यादव अनुबन्ध गर्दै विश लिस्टबाट बिकाश आग्रीलाई पनि टिममा समावेश गरिएको छ । जनकपुर बोल्ट्सको टिममा ११ खेलाडी परेका छन् ।

सुदूरपश्चिम रोयल्स
गत सिजन उपविजेता सुदूरपश्चिमले मार्की तथा कप्तान दिपेन्द्रसिंह ऐरीलाई पुनः रिटेन गरेको छ । त्यसैगरी विनोद भण्डारी, आरिफ शेख, अविनाश बोहरा, ईशान पाण्डे र नरेन साउदलाई पनि रिटेन गरिएको छ । अक्सनबाट हेमन्त धामी, टेकबहादुर रावत र दिपेश थापा अनुबन्ध भए भने विश लिस्टबाट दिपक बोहरा र मिलन बोहरा पनि टिममा सामेल भएका छन् ।

कर्णाली याक्स
कर्णालीले गत सिजन दोस्रो क्वालिफायरमा पुग्दै तेस्रो स्थान हासिल गरेको थियो । मार्की सोमपाल कामी, गुल्शन झा, नन्दन यादव, अर्जुन घर्ती, दिपेन्द्र रावत, बिपिन प्रसाद शर्मा र युनिशविक्रमसिंह ठकुरीलाई रिटेन गरिएको थियो । अक्सनबाट पवन सर्राफ, इमरान शेख, दीपक डुम्रे र युवराज खत्री अनुबन्ध भएका छन् ।

चितवन राइनोज
पहिलो संस्करणको एलिमिनेटर खेलमा पराजित चितवनले मार्की खेलाडी तथा कप्तान कुशल मल्लसहित रिजन ढकाल, कमलसिंह ऐरी, दीपक बोहरा, अमरसिंह राउटेला र गौतम केसीलाई रिटेन गरेको छ । अक्सनबाट देव खनाल र अर्जुन साउद अनुबन्ध भएका छन् भने विश लिस्टबाट बिपिन रावल, बिपिन आचार्य र रन्जित कुमारलाई टिममा समावेश गरिएको छ ।

काठमाण्डु गोर्खाज
पहिलो संस्करण पाँचौं स्थानमा रहेकाले काठमाण्डुले मार्की तथा कप्तान करण केसीसहित भीम सार्की, दिपेश कँडेल, शाहब आलम, प्रतिक श्रेष्ठ र राशिद खानलाई रिटेन गरेको छ । अक्सनबाट उत्तम थापा मगर, तुलबहादुर थापा, सन्तोष यादव, आकाश त्रिपाठी र आदिल आलम अनुबन्ध भएका छन् ।

विराटनगर किङ्स
विराटनगरले पहिलो संस्करण छैटौं स्थानमा रहेर प्रतियोगिता समाप्त गरेको थियो । स्टार लेग स्पिनर सन्दीप लामिछानेसहित लोकेश बम, प्रतिश जिसी, बसिर अहमद, नरेन भट्ट र सुवास भण्डारीलाई टिमले रिटेन गरेको छ । अक्सनबाट सूर्य तामाङ, साहिल पटेल र नारायण जोशी अनुबन्ध भए भने विश लिस्टबाट शर्वन किस्कु र शंकर राना पनि टिममा आएका छन् ।

पोखरा एभेन्जर्स
पोखराले मार्की खेलाडी कुशल भुर्तेलसहित ७ खेलाडी रिटेन गरेको थियो । दिनेश खरेल, बिपिन खत्री, सागर ढकाल, किरण ठगुन्ना, आकाश चन्द र तृतराज दास रहेका छन् । अक्सनबाट अभिषेक तिवारी, अर्जुन कुमाल र कृष्ण पौडेल अनुबन्ध भए भने विश लिस्टबाट सन्दीप खत्री क्षेत्रीलाई पनि टिममा ल्याइएको छ ।

लुम्बिनी लायन्स
लुम्बिनीले गत सिजनका मार्की तथा कप्तान रोहित पौडेलसँगै सन्दीप जोरा, विवेक यादव, तिलकराज भण्डारी, अभिशेष गौतम र दिनेश अधिकारीलाई रिटेन गरेको थियो । अक्सनबाट दिलिप नाथ, विशाल पटेल र शेर मल्ल अनुबन्ध भए भने विश लिस्टबाट दुर्गेश गुप्ता र आदिल खान टिममा समावेश भएका छन् ।

नेपाल प्रिमियर लिग २०८२ को दोस्रो संस्करणका लागि टोलीहरू यसरी तयार भएका छन् । विदेशी खेलाडीहरूको छनोट भने आगामी दिनमा टुंगिनेछ । यसपटक पनि एनपीएलले नेपाली क्रिकेटमा नयाँ उचाइ प्राप्त गर्ने विश्वास गरिएको छ ।