सर्लाही, २२ साउन । सर्लाहीको बरहथवामा स्कुल बसबाट खस्दा एक १३ वर्षीय बालकको ज्यान गएको छ ।

धनकौल गाउँपालिका–३ हरकठ्वाका निसार शेखका छोरा फैजान शेखको मृत्यु भएको जिल्ला प्रहरी कार्यालय सर्लाहीले जनाएको छ ।

कायाकल्प एकेडेमी, बरहथवामा कक्षा ३ मा अध्ययनरत फैजान विद्यालयबाट घर फर्कने क्रममा बिहीबार दिउँसो ग १ ख ९५६८ नम्बरको स्कुल बसको ढोकामा उभिरहेका थिए । बरहथवा नगरपालिका–८ को टाँडीस्थित भित्री सडकखण्डमा चलिरहेको बसबाट खस्दा उनी गम्भीर घाइते भएका थिए ।

स्थानीय संकटमोचन अस्पतालमा प्रारम्भिक उपचारपछि थप उपचारका लागि वीरगंजस्थित नेशनल मेडिकल कलेज लगिएको भए पनि साँझ ७ बजेतिर चिकित्सकले उनलाई मृत घोषित गरेका थिए ।

घटनापछि बस चालक बागमती नगरपालिका–१० का २१ वर्षीय राजकुमार यादवलाई प्रहरीले नियन्त्रणमा लिएको छ । इलाका प्रहरी कार्यालय बरहथवामा राखेर घटनाबारे थप अनुसन्धान भइरहेको जनाइएको छ ।

स्थानीयले स्कुल बसको सुरक्षामा लापरवाही भएको भन्दै जिम्मेवार पक्षमाथि कारबाहीको माग गरेका छन् ।