जनकपुरधाम, १९ साउन । धनुषा जिल्लाको सबैला नगरपालिका–९ भठियन बजारस्थित वर्षौँदेखि बन्द रहेको ‘सुशिला टाँकिज’ चलचित्रघर १७ वर्षपछि पुनः सञ्चालनमा आएको छ ।

राजनीतिक अस्थिरता, सिनेमा उद्योगको गिरावट र डिजिटल प्रविधिको चटारोका कारण बन्द भएको यो चलचित्रघर अब आधुनिक स्वरूपमा फर्किएको हो ।

सोमबारदेखि औपचारिक रूपमा सञ्चालनमा आएको टाँकिजको उद्घाटन मैथिली भाषाको चलचित्र ‘कलकतियावाली’बाट गरिएको छ । टाँकिजका सञ्चालक गुरुदेव यादवका अनुसार नयाँ पुस्तामा हल संस्कृतिको विकास गर्ने र स्थानीय समुदायलाई सस्तो, सहज र साङ्गठनिक मनोरञ्जन उपलब्ध गराउने लक्ष्यसहित पुनः सञ्चालन गरिएको हो ।

‘हामी अब नेपाली, हिन्दी र मैथिली भाषाका चलचित्रहरू प्रदर्शन गर्नेछौँ,’ सञ्चालक यादवले भने, ‘स्थानीय दर्शकको प्राथमिकताअनुसार तालिका बनाइनेछ र हल नियमित सञ्चालन गरिनेछ ।’

पुनः सञ्चालनमा ल्याइएको टाँकिजमा विशेष साउन्ड सिस्टम, आरामदायी सिट र अत्याधुनिक प्रविधिको प्रोजेक्सन स्क्रिन जडान गरिएको छ । चलचित्र हेर्न उपयुक्त वातावरण बनाउन भौतिक संरचनालाई समेत आकर्षक बनाइएको छ ।

स्थानीय युवा नागेन्द्र महराले भने, ‘सानो छँदा यही हलमा फिल्म हेरेको सम्झना छ । अहिले आफ्नै गाउँमै फेरि हल खुलेकोमा निकै खुशी लागेको छ । अब शहर धाउनु नपर्ने भयो ।’