जनकपुरधाम, २० असार । ‘स्वास्थ्यका लागि खेलकुद, राष्ट्रका लागि खेलकुद’ भन्ने मूल नाराका साथ कमला युवा सञ्जाल, धनुषाको आयोजनामा कमला नगरपालिका–९ दुब्बरकोट हतलेट्बामा शुक्रबारदेखि कमला क्रिकेट लिग औपचारिक रूपमा सुरु भएको छ ।

स्थानीय युवाको सक्रिय सहभागिता र खेलकुद प्रवद्र्धनको उद्देश्यसहित शुरु भएको यो प्रतियोगिता १२ दिनसम्म सञ्चालन हुने आयोजकले जानकारी दिएको छ । लिगमा विभिन्न टोल र क्लबका टिमहरूले प्रतिस्पर्धा गर्नेछन् ।

खेलकुदको माध्यमबाट शारीरिक तन्दुरुस्ती, आपसी भाईचारा तथा स्थानीय प्रतिभाको पहिचान गर्न सकिने विश्वाससहित कमला युवा सञ्जालले यो लिग आयोजना गरेको हो ।

उद्घाटन समारोहमा स्थानीय जनप्रतिनिधि, खेलप्रेमी, युवा तथा नागरिकको उल्लेखनीय उपस्थिति रहेको थियो । आयोजक समूहका अनुसार विजेता टिमलाई ट्रफी, प्रमाणपत्र र नगद पुरस्कार प्रदान गरिनेछ ।

कमला युवा सञ्जालका प्रतिनिधिहरूले यस किसिमका प्रतियोगिता नियमित रूपमा आयोजना गर्दै स्थानीय युवा क्षमता विकास र सकारात्मक क्रियाकलापमा संलग्न गराउने उद्देश्य रहेको बताएका छन् ।