काठमाडौं, १५ असार । संघीय लोकतान्त्रिक मोर्चाले सरकारप्रति दबाव सृजना गर्दै आगामी साउन र भदौ महिनामा देशका विभिन्न ६ स्थानमा जनसभा गर्ने निर्णय गरेको छ ।

आइतबार काठमाडौंको लाजिम्पाटस्थित एक होटलमा बसेको मोर्चाको बैठकले काठमाडौँदेखि वीरगंजसम्म जनसभाको कार्यक्रम तय गरेको हो ।

जनसभा तालिका अनुसार साउन १७ गते काठमाडौं, साउन २१ गते भैरहवा, साउन २३ गते कैलाली, भदौ १६ गते विराटनगर, भदौ १८ गते जनकपुरधाम र भदौ २० गते वीरगंजमा सभा आयोजना गरिनेछ ।

बैठकपछि पत्रकारहरूसँग कुरा गर्दै नागरिक उन्मुक्ति पार्टी (नाउपा) का संरक्षक रेशम चौधरीले संघीय लोकतान्त्रिक आन्दोलनलाई सशक्त बनाउँदै लैजान सभा–समारोह आवश्यक भएको बताएका हुन् । बैठकले मोर्चाको कार्यविधि समेत पारित गरेको छ ।

यसैबीच, रुपन्देही–३ को आगामी उपनिर्वाचनका सन्दर्भमा मोर्चाभित्र साझा उम्मेदवार उठाउने सहमति पनि बनेको छ । नाउपाले अघिल्लो निर्वाचनमा सो क्षेत्रमा प्राप्त मतको आधारमा आफूले उम्मेदवार पाउनुपर्ने दाबी गर्दै तीन जना अब्बल उम्मेदवार तयारी अवस्थामा रहेको बताएको छ ।

‘सर्वदलीय सहमतिका आधारमा नाउपाबाट उम्मेदवार उठ्नुपर्छ,’ चौधरीले भने, ‘उम्मेदवार चयन गर्ने अधिकार हामीलाई दिइयोस्, हामीसँग तीनजना योग्य उम्मेदवार छन् ।’

जनमत पार्टीबाहेक ६ दलले नाउपाको प्रस्तावमा सहमति जनाइसकेको चौधरीले जानकारी दिए । जनमत पार्टीले भने आफू पनि उम्मेदवार दिन इच्छुक रहेको बताएको छ । यद्यपि चौधरीले जनमत अध्यक्ष डा. सीके राउत पनि अन्ततः सहमतिमा आउने विश्वास व्यक्त गरेका छन् ।

बैठकमा नाउपाका रेशम चौधरी, लालबीर चौधरी, अरुण चौधरी, जसपाबाट राजकिशोर यादव, मनिष सुमन, राष्ट्रिय मुक्ति पार्टीबाट राजेन्द्र महतो, केशव झा, अनिल महासेठ, लोसपाबाट महन्थ ठाकुर, सर्वेन्द्रनाथ शुक्ल, लक्ष्मणलाल कर्ण, ज्ञानेन्द्र झा, जनमत पार्टीबाट अब्दुल खान, जनता प्रगतिशील पार्टीबाट हृदयेश त्रिपाठी, शिवजी यादव, सबिर हुसेन तथा तमलोपा नेताहरू वृषेशचन्द्र लाल र ब्रजकिशोर सिंह सहभागी थिए ।

मोर्चाले अबका दिनहरूमा साझा एजेन्डाका आधारमा गठबन्धन सुदृढ गर्दै आन्दोलनको स्वरूप विस्तार गर्ने तयारी गरेको जनाएको छ ।