विराटनगर, ९ असार । मोरङ जिल्ला अदालत परिसरबाट एक सजाय भुक्तानका लागि उपस्थित गराइएका कैदी फरार भएका छन् । चेक अनादर मुद्दामा दोषी ठहर भइसकेका विराटनगर महानगरपालिका–१३ का ४० वर्षीय विजय शंकर झा सोमबार अदालत परिसरबाट फरार भएका हुन् ।

सुनसरीको दुहबीबाट आइतबार पक्राउ गरिएका झालाई अदालतमा उपस्थित गराइएको थियो । सोही क्रममा शौचालय जान्छु भन्दै अदालत परिसरबाट निस्किएका झा त्यसपछि फरार भएको जिल्ला अदालत मोरङका सूचना अधिकारी हेमबहादुर बुढाथोकीले जानकारी दिए ।

झाविरुद्ध नागेश्वरप्रसाद साहले ७ लाख ५० हजार रुपैयाँ बिगो र सोही रकमको ब्याज दाबी गर्दै अदालतमा मुद्दा दायर गरेका थिए । अदालतले २०८० माघ २३ गते झालाई उक्त रकम तिर्ने गरी फैसला सुनाएको थियो ।

फैसला कार्यान्वयन नहुँदा साहले थप रूपमा झालाई कैद सजाय दिनुपर्ने मागसहित अर्को मुद्दा दर्ता गरेका थिए । त्यसमा अदालतले झालाई २ वर्षको कैद सजाय सुनाएको थियो ।

अदालत परिसरबाटै फरार भएका झा हालसम्म पनि फरार अवस्थामा रहेका छन् । उनको खोजीका लागि प्रहरी परिचालन गरिएको छ ।