जनकपुरधाम, ३१ जेठ । टिबी शाह स्मृति यु–१६ राष्ट्रिय एकदिवसीय क्रिकेट प्रतियोगिताको उपाधि मधेश प्रदेशले आफ्नो पोल्टामा पारेको छ ।

शनिबार कालिञ्चोक क्रिकेट मैदानमा सम्पन्न फाइनल खेलमा मधेशले बागमती प्रदेशलाई सात विकेटको फराकिलो अन्तरले पराजित गर्दै उपाधि चुमेको हो ।

बागमतीले प्रस्तुत गरेको ११२ रनको लक्ष्य मधेशले मात्र १३.४ ओभरमै तीन विकेटको क्षतिमा सहज रूपमा पार गर्यो । मधेशका ओपनर सान्तु मण्डलले उत्कृष्ट ब्याटिङ गर्दै अविजित ४३ रन बनाए। आयन मुखिया २९ र सुशान्त सिंह १२ रनमा अविजित रहे ।

बागमतीका लागि बलिङमा कप्तान प्रसिद्ध जेसीले दुई विकेट लिए भने कमल साहीले एक विकेट हात पारे । त्यसअघि टस हारेर पहिले ब्याटिङ गरेको बागमतीले मधेशको सशक्त बलिङका सामु टिक्न नसक्दै ३३ ओभरमा सबै विकेट गुमाएर ११२ रन मात्र बनाएको थियो । बागमतीका जेसीले सर्वाधिक २५ रन बनाए। रोहित ठाकुरले २२, आशिष गुप्ताले १७ र सूर्यान्शु कोइरालाले १० रनको योगदान दिए ।

मधेशका बलरहरू प्रभावशाली रहे । रोहन यादवले तीन विकेट लिए भने राजीवकुमार सदा र सलमान अली मन्सुरीले दुई–दुई विकेट लिएर बागमतीको पारी धरासायी बनाए ।

प्रतियोगितामा उत्कृष्ट प्रदर्शन गर्दै मधेशले टिबी शाह स्मृति यु–१६ एकदिवसीय उपाधि पहिलो पटक जितेको हो ।