जनकपुरधाम, २७ जेठ । चर्को गर्मीका कारण जनकपुरधाम उपमहानगरपालिकाले उपमहानगर क्षेत्रभित्रका सबै सामुदायिक तथा निजी विद्यालयहरू दुई दिनका लागि बन्द गर्ने निर्णय गरेको छ ।

शिक्षा तथा खेलकुद विकास शाखाका प्रमुख धीरेन्द्र लाल कर्णद्वारा जारी सूचनामा जेठ २९ र ३० गते विद्यालयमा पठनपाठन बन्द रहने उल्लेख छ ।

उपमहानगरपालिकाले तापक्रमको तीव्र वृद्धि बालबालिकाको स्वास्थ्यमा प्रतिकूल असर पार्न सक्ने भन्दै सावधानीस्वरूप विद्यालय बन्द गर्ने निर्णय लिएको हो । यद्यपि विद्यालय प्रशासन भने खुला रहने जनाइएको छ । सूचना अनुसार यो बन्द वार्षिक विदाबाट कट्टा गरिनेछ ।

स्थानीय अभिभावकहरूले उपमहानगरपालिकाको निर्णयलाई समयसापेक्ष र बालमैत्री कदम भन्दै स्वागत गरेका छन् । पछिल्ला केही दिनयता मधेश प्रदेशको तापक्रम ४० डिग्री सेल्सियसभन्दा माथि पुगेका कारण विद्यालय जाने उमेरका बालबालिका बढी प्रभावित हुने स्थिति देखिएको छ ।

जनकपुरधाममा मात्र नभई मधेशका अन्य जिल्लाहरूमा पनि अत्यधिक गर्मीले जनजीवन प्रभावित बनाउँदै लगेपछि स्वास्थ्य सुरक्षा र सावधानीका उपायहरू अपनाउन स्थानीय तहहरू सक्रिय बन्दै गएका छन् ।