जनकपुरधाम, १३ जेठ । मधेश प्रदेशका मुख्यमन्त्री सतिश कुमार सिंहले लामो समयदेखि अल्झिएको रामजानकी अन्तर्राष्ट्रिय बहुउद्देश्यीय रंगशालाको निर्माण कार्य अब एक साताभित्र शुरु हुने बताएका छन् ।

कानुनी अन्योलता, संस्थागत विवाद र प्रक्रियागत ढिलाइले थाँतीमा परेको यो बहुप्रतीक्षित परियोजना प्रदेश सरकारको निर्णायक हस्तक्षेपपछि अन्ततः अघि बढ्न लागेको हो ।

मुख्यमन्त्री सिंहका अनुसार रंगशालाको विस्तृत परियोजना प्रतिवेदन तयार भई गुठी संस्थानबाट आवश्यक स्वीकृति समेत प्राप्त भइसकेको छ । ‘अब केवल केन्द्रबाट एक पत्र पर्खिरहेकै छौं, त्यसपछि मन्त्रिपरिषद्बाट निर्णय गरेर काम थाल्नेछौं’, उनले भने ।

यो परियोजनाले भोगेको अन्योलको इतिहास उल्लेख गर्दै मुख्यमन्त्री सिंहले प्रारम्भमा राष्ट्रिय खेलकुद परिषद् (राखेप) को जिम्मामा रहेको योजना पछि गुठी संस्थानको कानुनी प्रक्रियामा अड्किएको बताए । २०७४ साल मंसिर ३ गते राखेप र गुठी संस्थानबीच वार्षिक ९ लाख रुपैयाँमा भएको लिज सम्झौता राखेपले समयमा भुक्तानी नगरेपछि गुठी ऐन, २०३३ को दफा ४१ बमोजिम स्वतः रद्द भएको थियो ।

पछिल्लो समय जनकपुरधाम उपमहानगरपालिका र मधेश प्रदेश सरकारको सहकार्यमा सो जग्गा पुनः लिजमा लिएर रंगशाला निर्माण थाल्न गृहकार्य भएको छ । वैशाख ११ गते गुठी संस्थानको प्रधान कार्यालय अन्तर्गत पूर्वाधार विकास तथा सम्पदा संरक्षण शाखाले मधेश प्रदेश सरकारलाई पत्र पठाउँदै नयाँ सम्झौताका लागि आह्वान गरिसकेको छ । अब मन्त्रिपरिषद्बाट निर्णय भएपछि सम्झौता विधिवत् कार्यान्वयनमा आउनेछ ।

यो रंगशालाको कुल लागत साढे २ देखि ३ अर्ब रुपैयाँसम्म पुग्ने अनुमान गरिएको छ । भारतका प्रधानमन्त्री नरेन्द्र मोदीको जनकपुर भ्रमणका क्रममा प्रतिवद्ध गरिएको १ अर्ब रुपैयाँ, मधेश प्रदेश सरकारको १ अर्ब रुपैयाँ बराबरको लगानी र बाँकी पूर्वाधार विस्तार जनकपुरधाम उपमहानगरपालिकाबाट हुने अपेक्षा गरिएको छ । उपमहानगरपालिकाले हालसम्म झण्डै डेढ करोड रुपैयाँ पूर्वाधारमा लगानी गरिसकेको छ ।

मुख्यमन्त्री सिंहले यो रंगशालालाई ‘नमुना खेलकुद संरचना’ को रूपमा विकास गर्ने योजना रहेको स्पष्ट पारे । खेलकुद तथा समाज कल्याण मन्त्रालयमार्फत आधुनिक डिजाइन, दर्शक क्षमतायुक्त स्टेडियम, बहुउद्देश्यीय कोर्ट तथा ट्र्याक निर्माणसहितको योजनामा काम भइरहेको छ ।

स्थानीय युवा, खेलकर्मी र समाजसेवीहरूले यो रंगशाला निर्माणलाई केवल पूर्वाधारको रूपमा नभई प्रदेशको पहिचान र आत्मविश्वाससँग जोडिएको परियोजना मान्दै आएका छन् ।

प्रदेश सरकारले अब यो आयोजना कार्यान्वयनमा ढिलाइ नगरी पारदर्शी र समयबद्ध ढंगले अघि बढाउने हो भने रामजानकी रंगशाला मधेशको गौरवमयी खेलकुद केन्द्र बन्न सक्ने अपेक्षा गरिएको छ ।