जनकपुरधाम, २ जेठ । जनकपुरधामको रामजानकी बहुउद्देश्यीय अन्तर्राष्ट्रिय रंगशालामा सम्पन्न तेस्रो संस्करणको जनकपुरधाम मेयर कप टी–२० क्रिकेट प्रतियोगिता भारतको उत्तर प्रदेशको लखनउ टोलीले जित्दै मधेशको माटोमा अन्तर्राष्ट्रिय उपाधि उचालेको छ । फाइनल खेलमा उत्कृष्ट प्रदर्शन गर्दै लखनउले नेपालकै बारा जिल्लाको बलियो टोलीलाई ८ विकेटले पराजित गर्यो ।

टस जितेर पहिले फिल्डिङ रोजेको लखनउले बारा टिमलाई निर्धारित २० ओभरमा १६८ रनमै समेट्न सफल भयो । त्यसपछि जवाफी ब्याटिङमा उत्रेको लखनउले १७.४ ओभरमै मात्र २ विकेट गुमाएर १७३ रनको लक्ष्य सहजै पार गर्दै उपाधि आफ्नो पोल्टामा पारेको हो । खेलको शुरुवातदेखि नै आक्रामक रणनीति अख्तियार गरेको लखनउ टोलीले ब्याटिङ र बलिङ दुवैमा सन्तुलित प्रदर्शन गर्दै विजयी बनेको थियो ।

यद्यपि उपाधि भने लखनउले हात पारे पनि प्रतियोगिताका सबैभन्दा चर्चित खेलाडी भने बारा टिमका राष्ट्रिय स्तरका क्रिकेटर विवेक यादव बने । उनले प्रतियोगिता अवधिभर एक शतक र एक अर्धशतकसहित कुल २२५ रन बनाउँदै प्लेयर अफ द सिरिज र बेस्ट ब्याट्सम्यान दुवै उपाधि आफ्नो नाममा लेखाए । यति मात्र नभई सेमिफाइनलमा ५ विकेट लिँदै उनले आफ्नो उत्कृष्ट ऑल–राउन्ड क्षमता समेत देखाएका थिए ।

बलिङतर्फ पर्सा टिमका रञ्जित कुमारले २ म्याचमा ६ विकेट लिँदै बेस्ट बलरको उपाधि हात पार्न सफल भए । उत्कृष्ट ब्याट्सम्यान र बलर दुवैले नगद १०/१० हजार रुपैयाँसहित ट्रफी प्राप्त गरे भने विवेक यादवले प्लेयर अफ द सिरिजको रूपमा १५ हजार नगद र ट्रफी प्राप्त गरे ।

प्रतियोगितामा मधेश प्रदेशका ८ जिल्लासहित भारतका बिहार र उत्तर प्रदेशबाट २ टिम, दिल्लीबाट १ टिम सहभागी थिए । कुल १२ टिम सहभागी रहेको यस प्रतियोगिताले यसपालि अन्तर्राष्ट्रिय स्वरूप ग्रहण गरेको देखिएको छ । सीमापारका टोलीहरूको सहभागिताले नेपाल–भारतबीचको खेल सम्बन्धलाई नयाँ उचाइ दिएको छ ।

प्रतियोगिता जनकपुरधाम उपमहानगरपालिकाको आयोजनामा, नेपाल क्रिकेट संघको सहयोग र जिल्ला क्रिकेट संघ धनुषाको समन्वयमा सम्पन्न भएको हो । कार्यक्रमको समापनमा मधेश प्रदेशका मुख्यमन्त्री सतिश कुमार सिंह प्रमुख अतिथिका रूपमा सहभागी थिए । उनले विजेता तथा व्यक्तिगत उपाधि जित्ने खेलाडीहरूलाई ट्रफी, मेडल, प्रमाणपत्र र नगद पुरस्कार प्रदान गरे ।

मुख्यमन्त्री सिंहले समापन समारोहमा बोल्दै जनकपुरधामको रामजानकी अन्तर्राष्ट्रिय रंगशाला निर्माणका लागि प्रदेश सरकारले २ अर्ब ५० करोड रुपैयाँको बजेट तयारी गरिरहेको जानकारी दिए । उनले छिट्टै टेण्डर प्रक्रिया सुरु हुने र जग्गा विवाद समाधानसँगै निर्माण कार्य तीव्र गतिमा अघि बढाइने प्रतिबद्धता व्यक्त गरे ।

तेस्रो संस्करणमा प्रवेश गरेको जनकपुरधाम मेयर कप अब मधेश प्रदेशकै एक प्रतिष्ठित वार्षिक खेलकुद उत्सव बन्दै गएको छ । यस प्रतियोगिताले स्थानीय युवालाई आफ्नो प्रतिभा देखाउने मंचमात्र दिएको छैन, राष्ट्रिय तथा अन्तर्राष्ट्रिय स्तरमा अघि बढ्ने अवसर समेत प्रदान गरिरहेको छ ।