विराटनगर, ३० वैशाख । कोशी प्रदेशका मुख्यमन्त्री हिक्मत कुमार कार्कीको कार्यकक्षमा अबदेखि मोबाइल फोन लिएर प्रवेश गर्न नपाइने भएको छ । सुरक्षा र गोपनीयता सुनिश्चित गर्न भन्दै मुख्यमन्त्रीको सचिवालयले यस्तो व्यवस्था लागू गरेको हो ।

मुख्यमन्त्री कार्कीलाई भेट्न कार्यकक्षमा जानेले अब आफ्नो मोबाइल फोन कार्यकक्षबाहिरै राख्नुपर्नेछ । सचिवालयले कार्यकक्षको प्रवेशद्वारनजिकै मोबाइल राख्नका लागि विशेष व्यवस्था गरेको छ । त्यहाँ प्लाष्टिकको बकेट राखिएको छ जसमा स्पष्ट रुपमा लेखिएको छ —‘मोबाइल फोन यता’।

मुख्यमन्त्रीका प्रेस सल्लाहकार विक्रम लुइँटेलका अनुसार मोबाइल निषेधको यो निर्णय मुख्यतः सुरक्षा सतर्कता र समय व्यवस्थापनका कारण गरिएको हो । ‘कार्यालय परिसरको केही संरचना हाल मर्मत र पुनःनिर्माणमा छन्,’ उनले भने, ‘बाह्य सुरक्षा जाँच चोकमा नियमित रुपमा नहुँदा कार्यकक्षमा संवेदनशीलता बढेको छ । त्यसैले मोबाइल लैजान रोक लगाइएको हो ।’

उनका अनुसार फोटो खिच्ने र भिडियो बनाउने क्रम बढ्दै गएको थियो जसले गर्दा मुख्यमन्त्रीको कार्यतालिका प्रभावित हुने गरेको थियो । ‘कसैकसैले भेटघाटको क्रममा अनुमति नलिई मोबाइलमार्फत फोटो खिच्ने वा भिडियो बनाउने गरेका थिए,’ लुइँटेलले बताए । यसले समयको अपव्यय मात्रै नभई गोपनीयता र मर्यादामा समेत असर पार्ने जोखिम देखिएको उनले बताए ।

सचिवालयले भने यो अस्थायी व्यवस्था रहेको र सुरक्षात्मक मापदण्डहरू थप बलियो भएपछि यसमा फेरबदल हुन सक्ने जनाएको छ ।