जनकपुरधाम, ३० वैशाख । मधेश प्रदेशको खेलकुद विकासमा नयाँ ऊर्जा भर्ने उद्देश्यसहित नेपाल कराते महासंघ मधेश प्रदेश टिमले प्रदेश खेलकुद परिषद्का नवनियुक्त सदस्य सचिव शिवजी गुप्तासँग मंगलबार विशेष भेटघाट तथा छलफल कार्यक्रम सम्पन्न गरेको छ । जनकपुरधाममा आयोजित उक्त कार्यक्रम महासंघका अध्यक्ष रामचन्द्र ठाकुरको नेतृत्वमा सम्पन्न भएको हो ।

खेलकुद क्षेत्रका समसामयिक चुनौती, खेलाडी तथा प्रशिक्षकका हकहित, पूर्वाधारको अवस्था र संरचनागत समस्याहरूलाई सचिव गुप्ताको ध्यानाकर्षण गराउनु तथा आपसी सहकार्यको सम्भावना उजागर गर्नु कार्यक्रमको उद्देश्य थियो । कार्यक्रममा अध्यक्ष ठाकुरले सचिव गुप्तालाई स्वागत गर्दै मधेश प्रदेशको खेलकुद क्षेत्रलाई नयाँ उचाइमा पुर्याउन सबै संघसंस्थाबीच सहकार्य आवश्यक रहेको बताए ।

उनले भने, ‘खेलकुद परिषद्ले सही नेतृत्व दिँदा धेरै सम्भावनाहरूलाई मूर्तरूप दिन सकिन्छ । हामी कराते महासंघको तर्फबाट पूर्ण सहयोग गर्नेछौं ।’

सदस्य सचिव गुप्ताले प्रदेशको खेलकुद क्षेत्रको समग्र विकासलाई आफ्नो प्रमुख कार्यभारका रूपमा लिने प्रतिबद्धता जनाए । उनले पारदर्शिता, समन्वय र दीर्घकालीन योजना आवश्यक रहेको उल्लेख गर्दै भने, ‘मधेश प्रदेशलाई खेलकुदको ‘हब’ बनाउन रणनीतिक ढंगले अगाडि बढ्छौं । सबै खेल संघहरूको सुझावलाई प्राथमिकतामा राख्नेछौं ।’

कार्यक्रममा बोल्ने अन्य वक्ताहरूले पनि खेलकुद पूर्वाधारको कमजोर अवस्था, आवश्यक सुविधा तथा प्रशिक्षणको अभाव, प्रशिक्षकहरूको कम प्रोत्साहन, बजेटको न्यूनता र खेलाडीको करिअर विकास जस्ता मुद्दाहरू उठाए । वरिष्ठ कराते प्रशिक्षक जिवछ भगतले मधेश प्रदेशका धेरै जिल्लामा खेलाडीको प्रतिभा भए पनि संरचनाको अभावले उनीहरू पछाडि परिरहेको बताए ।

नेपाल लोकतान्त्रिक खेलकुद संघका प्रतिनिधिहरूले खेल संघ र परिषद्को सहकार्यलाई पारदर्शी र उद्देश्यपरक बनाउनेतर्फ ध्यान दिन सुझाव दिए । सहभागीहरूले खेलकुद क्षेत्रको दिगो विकासका लागि स्पष्ट नीति, रणनीतिक योजना तथा दीर्घकालीन लक्ष्य आवश्यक रहेको उल्लेख गरे । खेलकुद परिषद्ले बजेट निर्माणदेखि कार्यान्वयनसम्म सबै प्रक्रियामा संघसंस्थाको प्रतिनिधित्व सुनिश्चित गर्नुपर्ने मागसमेत राखिएको थियो ।

गोजुरियो ओसिकाइ कराते मधेश प्रदेशका अध्यक्ष अखिल मढिकर्मीले कराते जस्ता इमर्जिङ खेलहरूलाई विशेष प्रोत्साहन आवश्यक रहेको धारणा राखे । ‘यस्ता खेलमा राष्ट्रिय तथा अन्तर्राष्ट्रिय स्तरमा नाम कमाउने सम्भावना छ,’ उनले भने ।