एजेन्सी, २९ वैशाख । भारतले आफ्नो आक्रमणको क्रममा १०० भन्दा बढी आतंककारीलाई मारिएको दाबी गरेको छ ।

सोमबार राति राष्ट्रको नाममा सम्बोधन गर्दै प्रधानमन्त्री नरेन्द्र मोदीले यसबारे जानकारी दिएका हुन् । उनले यसका साथै पाकिस्तानको आग्रहमा भारतले युद्ध रोक्न सहमति व्यक्त गरेको पनि बताए । मोदीले भारतले पाकिस्तानविरुद्धको सैन्य कदमलाई स्थगित गरेपनि पाकिस्तानले आफ्नो आतंकवादी गतिविधि जारी राखे थप कारबाही गर्न सक्ने चेतावनी दिए ।

प्रधानमन्त्री मोदीले भने, ‘हाम्रो एकता हाम्रो सबैभन्दा बलियो शक्ति हो । हामी सबै आतंकवादविरुद्ध एकजुट छौं । यो युद्धको युग होइन । यो आतंकवादको युग पनि होइन । आतंकवादको विरुद्ध शून्य सहनशीलता नै हाम्रो सर्वोच्च नीति हो ।’
उनले पाकिस्तानको सेना र सरकारलाई लक्षित गर्दै भने, ‘यदि पाकिस्तानले आफ्नो आतंकवादी पूर्वाधारलाई नष्ट गर्न सकेन भने त्यो देशलाई नै ध्वस्त पार्ने हाम्रो योजना छ । यदि पाकिस्तानलाई बाँच्न छ भने उसले आतंकवादलाई प्रोत्साहन गर्ने सबै गतिविधि बन्द गर्नुपर्नेछ ।’

मोदीले थपे, ‘हाम्रो दृष्टिकोण स्पष्ट छ—यदि वार्ता हुन्छ भने त्यो केवल आतंकवादविरुद्ध हुनेछ । कुनै पनि वार्ता आतंकवादको सवालमा मात्रै हुनेछ । र, त्यो पाकिस्तानभित्र मात्रै हुनेछ । हामी शान्तिका लागि प्रयास जारी राख्नेछौं । तर, यदि आतंकी गतिविधि जारी राखियो भने त्यसको कडा जवाफ दिनेछौं ।’

प्रधानमन्त्री मोदीले बुद्ध पूर्णिमाको अवसरमा शान्तिको महत्वलाई स्मरण गराउँदै भने, ‘बुद्धले हामीलाई शान्तिको मार्ग देखाउनु भएको छ । शान्तिको बाटो शक्ति र एकताबाट जान्छ । मानवतालाई शान्ति र समृद्धि तर्फ अघि बढाउन प्रत्येक भारतीय सक्षम छ । विकसित भारतको सपना पूरा गर्न हामीलाई शक्तिशाली हुनै पर्छ ।’