सिरहा, २६ वैशाख । लामो प्रतिक्षा, धेरैको उत्सुकता र अथाह ऊर्जा बोकेको मिर्चैया मेयर गोल्डकप फुटबल प्रतियोगिता २० वर्षपछि पुनः आयोजित हुँदै शुक्रबार एक अविस्मरणीय समापनमा पुग्यो ।

उच्च माध्यमिक विद्यालयको प्रांगणमा आयोजित रोमाञ्चक फाइनल खेलमा सिरहा धनगढी टिमले धनुषाको खैरबोना–२ टोललाई १–० को गोलअन्तरले हराउँदै उपाधिमाथि कब्जा जमायो ।

प्रतियोगिता बैशाख १९ गतेदेखि सुरु भई एक साता लामो प्रतिस्पर्धापछि समापन भएको हो । आठ वटा टिमको सहभागिता रहेको यस खेलकुद महोत्सवमा सिरहा धनगढीको उत्कृष्ट प्रदर्शनले दर्शकको मन जित्नुका साथै उपाधिसँगै नगद ६८ हजार रुपैयाँ पुरस्कार जित्न सफल भयो । उपविजेता बनेको खैरबोना टिमले ४१ हजार ५ सय रुपैयाँ नगद पुरस्कार प्राप्त गर्यो ।

पुरस्कार वितरण समारोहमा मिर्चैया नगरपालिकाका नगरप्रमुख श्रवण यादव प्रमुख अतिथि थिए । उनले विजेता तथा उपविजेता टिमहरूलाई ट्रफी, प्रमाणपत्र, नगद चेक र दोसल्ला ओढाएर सम्मानित गरे ।

नगरप्रमुख यादवले भने, ‘बीस वर्षपछि मिर्चैयामा फुटबल फर्किनु केवल खेलको पुनरागमन नभई समुदाय र युवालाई सकारात्मक बाटोतर्फ उन्मुख गराउने प्रयास हो ।’ उनले यसलाई नियमित बनाउँदै स्थानीय स्तरमै खेल क्षेत्रको विकास गर्ने प्रतिबद्धता पनि व्यक्त गरे ।

खेलमा व्यक्तिगत प्रदर्शनमा समेत उत्कृष्टता देखाउने खेलाडीहरूलाई विशेष पुरस्कार प्रदान गरिएको थियो । म्यान अफ द म्याच घोषित भए पुस्पराज चौधरी । त्यस्तै, गोल्डेन बुट रबिन यादव, गोल्डेन गोल्स दिलीप साई र टुर्नामेन्ट अफ द प्लेयर विश्व राई घोषित भए । यी सबै खेलाडीहरूलाई अतिथिहरूद्वारा ट्रफी, प्रमाणपत्र र पुरस्कारले सम्मान गरिएको थियो ।

खेल आयोजक समितिका अनुसार अब हरेक वर्ष मिर्चैया मेयर गोल्डकपलाई नियमित गर्ने र सहभागी टिमको संख्या बढाउने लक्ष्य लिइएको छ ।