जनकपुरधाम, २६ वैशाख । जनकपुरधाम–१४ स्थित रामजानकी बहुउद्देश्यीय अन्तर्राष्ट्रिय रंगशालामा सुरु भएको तेस्रो जनकपुरधाम मेयर कप टी–२० क्रिकेट प्रतियोगिता उत्कृष्ट प्रदर्शनका साथ महोत्तरी र सर्लाहीको जितसँगै सुरु भएको छ ।

प्रतियोगिताको उद्घाटन खेलमा महोत्तरीले प्रतिद्वन्द्वी धनुषालाई ४४ रनको अन्तरले पराजित गर्दै विजयी शुरुवात गरेको हो । टस जितेर पहिला ब्याटिङ रोजेको महोत्तरीले निर्धारित २० ओभरमा ४ विकेट गुमाउँदै १६२ रनको बलियो योगफल खडा गर्यो । टोलीका लागि अभिषेक तिवारीले ४९ रनको उत्कृष्ट पारी खेले भने नवीन यादव ४६ रनमा अविजित रहे ।

धनुषाको बलिङ कमजोर देखिए पनि मयन यादवले केही समय टिकाउ प्रदर्शन गर्दै २६ रन जोड्न सफल भए । तर टोलीका अन्य ब्याट्सम्यानहरूले निरन्तर विकेट गुमाउँदा धनुषाको इनिङ्स ११८ रनमै समाप्त भयो ।

महोत्तरीको जितमा निर्णायक भूमिका खेलेका रमेश सहनीले ४ ओभरमा जम्मा १६ रन खर्चेर ४ महत्वपूर्ण विकेट लिए । उनको घातक बलिङ स्पेलका कारण धनुषाको पारी कमजोर साबित भएको हो । उत्कृष्ट प्रदर्शनका आधारमा सहनी ‘म्यान अफ द म्याच’ घोषित भए ।

त्यस्तै, उद्घाटन दिनको दोस्रो खेलमा सर्लाहीले प्रतिस्पर्धी सप्तरीलाई ५ विकेटले पराजित गर्यो । पहिले ब्याटिङ गरेको सप्तरीले ९ विकेट गुमाउँदै १५२ रन बनायो । सप्तरीका भोला साहले ३१ रन र पप्पु यादवले ३० रन बनाए ।

१५३ रनको लक्ष्य लिएर मैदानमा उत्रेको सर्लाहीले १८.३ ओभरमै लक्ष्य पूरा गर्दै रोमाञ्चक जित हात पार्यो । सर्लाहीका जितेश मण्डलले आक्रामक ब्याटिङ गर्दै ३२ बलमा २ चौका र ३ छक्का सहित ४४ रनको अविजित पारी खेले । उत्कृष्ट प्रदर्शनका लागि उनी ‘म्यान अफ द म्याच’ बने । बलिङतर्फ सर्लाहीका विशाल पटेलले पनि ४ ओभरमा १६ रन खर्चेर २ विकेट लिएर उल्लेखनीय योगदान दिएका थिए ।

प्रतियोगिताअन्तर्गत भोलि (शनिबार) पहिलो खेल बिहान ९ बजे भारतको पूर्णिया र महोत्तरीबीच हुनेछ । दोसो खेल भने दिउँसो १ बजे सप्तरी र भारतकै मुज्जफरपुरबीच हुने आयोजकले जानकारी दिएको छ ।

जनकपुरधाममा आयोजना गरिएको मेयर कपले सीमावर्ती क्षेत्रमा रहेको खेलाडी प्रतिभालाई प्रदर्शन गर्ने अवसर प्रदान गर्दै आएको छ । रंगशालामा दर्शकहरूको उत्साहजनक उपस्थिति देखिएको छ भने आयोजकले प्रतियोगिता व्यवस्थित र मर्यादित रुपमा सञ्चालन भइरहेको जनाएको छ ।