जनकपुरधाम, २४ वैशाख । मधेश प्रदेशको राजधानी जनकपुरधाममा तेस्रो संस्करणको ‘जनकपुरधाम मेयर कप क्रिकेट प्रतियोगिता’ यही शुक्रबार (वैशाख २६) देखि सुरु हुने भएको छ ।

जनकपुरधाम उपमहानगरपालिकाको आयोजना र जिल्ला क्रिकेट संघ धनुषाको सहकार्यमा हुन लागेको यो प्रतियोगिता जेठ २ गतेसम्म सञ्चालन हुनेछ ।

प्रतियोगितामा भारतका चारवटा शहर — दिल्ली, लखनऊ, मुझफ्फरपुर र पुर्णियाबाट एक–एक टिमसहित जम्मा १२ टिम सहभागी हुने भएका छन् । बाँकी आठ टिम मधेश प्रदेशका आठवटै जिल्लाबाट रहनेछन् ।

जिल्ला क्रिकेट संघ धनुषाका अध्यक्ष शोभाकान्त पाण्डे (गुड्डु)का अनुसार सबै टिमलाई चार समूहमा विभाजन गरिएको छ । प्रत्येक समूहमा एक भारतीय टिम रहने गरी टिम गठन गरिएको हो । प्रतियोगिता लिग प्रणालीमा खेलाइने छ ।

प्रतियोगिताको उद्घाटन खेलमा घरेलु टिम धनुषा र सर्लाहीबीच प्रतिस्पर्धा हुने आयोजकले जानकारी दिएको छ । यो खेलले प्रतियोगिताको शुरुवात मात्र नभई स्थानीय क्रिकेटप्रेमीहरूलाई रोमाञ्चक शुरुवातको अनुभूति पनि दिलाउने बताइएको छ ।

कूल अनुमानित ३५ लाख रुपैयाँ लागतमा आयोजना गरिने प्रतियोगिताका लागि २० लाख रुपैयाँ जनकपुरधाम उपमहानगरपालिकाबाट, बाँकी रकम नेपाल क्रिकेट संघ तथा विभिन्न प्रायोजकहरूबाट जुटाइने भएको छ ।

अध्यक्ष पाण्डेले जनकपुरधाममा निर्माणाधीन रामजानकी अन्तर्राष्ट्रिय बहुउद्देश्यीय रंगशालाको प्रचार–प्रसार, दक्ष खेलाडी उत्पादन, खेलकुदमा जनसहभागिता वृद्धि र अन्तर्राष्ट्रियस्तरको प्रतिस्पर्धाको माहोल निर्माण गर्न कपको आयोजना गरिएको जानकारी दिए ।

क्रिकेट संघका सदस्य सरोजकुमार मिश्रका अनुसार मैदान र पिच तयारी अन्तिम चरणमा पुगेको छ । उनले भने, ‘हामी दुई सातादेखि टेक्निकल टिमको सहयोगमा मैदानलाई मापदण्डअनुसार तयार गरिरहेका छौं । यसपालि खेल बढी प्रतिस्पर्धात्मक र व्यवस्थित हुने विश्वास छ ।’

पछिल्लो संस्करणको मेयर कपमा बारा जिल्ला विजयी भएको थियो । बारा टिमले धनुषालाई पराजित गर्दै उपाधि हात पारेको थियो । पहिलो संस्करणमा भने धनुषाले बारालाई हराएर उपाधि जितेको थियो । यस वर्ष यी दुई प्रतिस्पर्धीबीच पुनः टक्कर हुने सम्भावनाले प्रतियोगितालाई अझ चाखलाग्दो बनाएको छ ।

स्थानीय सरकारको सक्रियतामा आयोजना हुने यो प्रतियोगिता केवल क्रिकेट प्रतियोगिता नभई जनकपुरधामलाई खेलकुद गन्तव्यका रूपमा स्थापित गर्ने दीर्घकालीन रणनीतिको हिस्सा बनेको छ । भारतका टिमहरूसँगको प्रतिस्पर्धाबाट नेपाली खेलाडीहरूले अनुभव र आत्मविश्वास हासिल गर्ने विश्वास गरिएको छ ।

स्थानीय खेलकुदप्रेमीहरू, विद्यार्थी, युवा र व्यापारीहरूबीच प्रतियोगिता प्रति उत्साह बढिरहेको छ । आयोजकको अनुमानमा प्रतियोगितामा हजारौं दर्शकको उपस्थिति रहनेछ ।