जनकपुरधाम, १७ वैशाख । धनुषा जिल्ला क्रिकेट संघको आयोजनामा यू–१६ पुरुष क्रिकेट खेलाडी छनौट प्रतियोगिता जनकपुरधामस्थित रामजानकी अन्तर्राष्ट्रिय बहुउद्देश्यीय रंगशालामा सुरु भएको छ । एसिया कप लक्षित टोली निर्माणका लागि सञ्चालन गरिएको यो प्रतियोगिताबाट छानिएका उत्कृष्ट खेलाडीहरूलाई प्रदेशस्तरीय टिममा प्रतिनिधित्व गराउने तयारी गरिएको छ ।

धनुषा जिल्ला क्रिकेट संघका अध्यक्ष शोभाकान्त पाण्डेका अनुसार प्रतियोगिता यू–१६ राष्ट्रिय टिम गठन प्रक्रियाको पहिलो चरणको रूपमा लिइएको छ । ‘हामीले एसिया कपको तयारीका लागि आधार बलियो बनाउने सोचका साथ जिल्ला स्तरबाट टिम छनौटको प्रक्रिया सुरु गरेका हौं,’ पाण्डेले भने ।

उनका अनुसार प्रतियोगिताका लागि खेलाडीहरूलाई सार्वजनिक रूपमा नाम दर्ता गर्न आह्वान गरिएको थियो । प्राप्त नामहरूलाई विश्लेषण गर्दै कुल पाँच टिम बनाइएको छ । जसअन्तर्गत प्रत्येक खेलाडीले कम्तीमा चारवटा म्याच खेल्न पाउने छन् । सबै टिम एक–अर्कासँग प्रतिस्पर्धा गर्ने र त्यसै आधारमा उत्कृष्ट खेलाडीको छनौट गरिनेछ ।

खेलाडी छनौटको जिम्मेवारी पूर्व अन्तर्राष्ट्रिय प्रशिक्षक नवीन कुमार सिंह, पूर्व राष्ट्रिय खेलाडी लाला गुनवन्त सिंह, सचिन कुमार सिंह र जिल्ला टिमका अन्सारुल राइनको चयन समितिले पाएको छ । छनौट समितिका प्रमुख नवीन कुमार सिंहले यू–१६ उमेर समूहलाई लक्षित गर्दै भविष्यको राष्ट्रिय टिम निर्माणको लागि आजैदेखि गम्भीर तयारी गरिनु आवश्यक रहेको बताए ।

‘यू–१६ खेलाडीहरू प्रायः ५ देखि ८ कक्षासम्म अध्ययनरत हुन्छन् । ती खेलाडीलाई योग्य बनाउँदै राष्ट्रिय स्तरमा पुर्याउन ७/८ वर्ष समय लाग्छ । तर, यदि अहिले नै उपयुक्त संरचना र प्रशिक्षणको व्यवस्था गरियो भने हामी लक्षित परिणाममा पुग्न सक्छौं,’ प्रशिक्षक सिंहले भने ।

उनले भने, ‘हामीले शुरुवात गरिसकेका छौं । अब निरन्तरता, अनुशासन र पारदर्शितासहितको प्रशिक्षण र छनौट प्रक्रिया अपनाउने हो भने धनुषाबाट अन्तर्राष्ट्रिय स्तरका क्रिकेटरहरू उत्पादन सम्भव छ ।’

जनकपुरधाममा निर्माण भएको रामजानकी अन्तर्राष्ट्रिय बहुउद्देश्यीय रंगशालाको प्रयोग यस्ता प्रतियोगिता सञ्चालनमा हुन थालेपछि स्थानीय खेलकुद गतिविधिहरूमा नयाँ ऊर्जा थपिएको छ । क्रिकेट संघका अध्यक्ष पाण्डेले रंगशालाको सदुपयोग गर्दै अन्य तहका प्रतियोगिताहरू पनि आयोजना गरिने जानकारी दिए । उनले यही वैशाख २६ गतेदेखि यहाँ तेस्रो जनकपुरधाम मेयर कप प्रतियोगिताको पनि आयोजना गर्न लागिएको बताए ।

खेलप्रेमी, अभिभावक, विद्यालय र स्थानीय तहको सहयोगमा यो छनौट प्रतियोगिता सफल हुने अपेक्षा गरिएको छ । खेल मैदानमा भइरहेको प्रतिस्पर्धाबाट जिल्लामा खेलकुद चेतना जागृत हुनुका साथै भविष्यमा राष्ट्रिय तथा अन्तर्राष्ट्रिय स्तरमा टिम पठाउने सपना साकार हुने आशा गरिएको छ ।

तस्बिरहरू : पत्रकार घनश्याम मिश्र