काठमाडौं, ६ फागुन । भारतको ओडिशा राज्यको भुवनेश्वरस्थित कलिंगा इन्स्टिच्यूट अफ इन्डस्ट्रियल टेक्नोलोजी (केआईआईटी)ले नेपाली विद्यार्थी प्रकृति लम्सालको मृत्युपछि आफ्नो सुरक्षा गार्ड र केही कर्मचारीलाई निलम्बन गरेको जनाएको छ ।
आज एक प्रेस नोट जारी गर्दै केआईआईटीले उक्त घटनामा संलग्न गल्ती गर्ने अधिकारीहरूलाई निलम्बन गर्न कदम चालेको पुष्टि गरेको छ । विश्वविद्यालयले यस घटनालाई दुर्भाग्यपूर्णको रूपमा उल्लेख गर्दै ओडिशा सरकारको ध्यानाकर्षण भएको जानकारी दिएको छ ।
ओडिशा सरकारले गठन गरेको उच्चस्तरीय तथ्य छानबिन समितिको निष्कर्षका आधारमा सम्बन्धित कर्मचारीहरूलाई कानुनी र प्रशासनिक कारबाही गरिनेछ भन्ने सूचनामा उल्लेख गरिएको छ ।
यस समितिमा प्रदेशका गृह विभागका अतिरिक्त मुख्य सचिव, महिला तथा बाल विकास विभागका प्रमुख सचिव र उच्च शिक्षा विभागका आयुक्त सहसचिव सदस्य रहेका छन् ।
साथै, ओडिशा सरकार प्रत्येक विद्यार्थीको सुरक्षा, मर्यादा र कल्याण सुनिश्चित गर्न प्रतिबद्ध रहेको पनि सूचनामा जोड दिइएको छ ।
प्रकृति लम्साल आइतबार साँझ होस्टेलको आफ्नै कोठामा झुण्डिएको अवस्थामा मृत फेला परेकी थिइन् । यस घटनापछि केआईआईटीले आफ्ना केही कर्मचारीहरूलाई निलम्बन गरेको हो ।
यस घटनामा विश्वविद्यालय प्रशासनले कडा कदम चालेको भए पनि घटनामा संलग्न अन्य पक्षहरूको कानुनी कारबाही प्रक्रिया अघि बढाउने तयारी गरिएको छ ।
