काठमाडौँ, ६ फागुन । शिक्षा, विज्ञान तथा प्रविधि मन्त्रालयले भारतको ओडिसास्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) मा अध्ययनरत नेपाली विद्यार्थी प्रकृति लम्सालको शङ्कास्पद मृत्युपछि उत्पन्न समस्याको समाधान नगरे भविष्यमा त्यहाँ नेपाली विद्यार्थी पठाउन रोक लगाउने चेतावनी दिएको छ ।
मंगलबार मन्त्रालयले एक विज्ञप्ति जारी गर्दै उक्त घटनाको समाधान नगरे भारतको ओडिसा राज्यमा रहेको शैक्षिक संस्थाहरूमा अध्ययन गर्नको लागि आवश्यक वैदेशिक अध्ययन अनुमतिपत्र (एनओसी) स्थगित गर्न सकिने चेतावनी दिइएको हो ।
विज्ञप्तिमा भनेको छ, ‘उक्त घटनाबाट सृजित समस्याको न्यायपूर्ण र वैधानिक समाधान नगरेमा भविष्यमा भारतका ओडिसा राज्यका विश्वविद्यालय र शिक्षण संस्थानहरूमा अध्ययनको लागि एनओसी प्रदान नगर्ने कार्य स्थगित गर्न सकिन्छ ।’ यसले भविष्यमा त्यहाँ अध्ययनका लागि जाने नेपाली विद्यार्थीहरूको संख्या घट्ने सम्भावना रहेको संकेत गर्दछ ।
शिक्षा मन्त्रालयले केआईआईटीमा अध्ययनरत प्रकृति लम्सालको मृत्यु र त्यसपछि सिर्जित घटनामा विश्वविद्यालय प्रशासनको निन्दनीय व्यवहारलाई ध्यानमा राख्दै समस्या समाधानका लागि कूटनीतिक पहल गर्ने अनुरोधसमेत परराष्ट्र मन्त्रालयलाई गरेको छ ।
केआईआईटीमा १७ वर्षीया लम्सालको रहस्यमय मृत्यु भएको थियो । यस घटनाले नेपाली विद्यार्थीहरूको बीचमा गहिरो चिन्ता र आक्रोशको माहोल सिर्जना गरेको छ । मन्त्रालयले घटनामा संलग्न दोषीलाई दण्डित गर्न र भविष्यमा यस्ता घटनाहरूको पुनरावृत्ति रोक्न कडा कदम चाल्न आग्रह गरेको छ ।
