एजेन्सी, ५ फागुन । भारतको ओडिसा राज्यको केआइआइटीमा बीटेक तेस्रो वर्षमा पढाइ गर्दै गरेकी नेपाली विद्यार्थी प्रकृति लम्सालको आत्महत्या प्रकरणमा एक युवक पक्राउ परेका छन् ।

पक्राउ परेका युवकको नाम अदभिक श्रीवास्तव रहेको र भारतीय मिडियाका अनुसार उनलाई प्रकृतिका केटा साथीको रूपमा चिनाइएको छ ।

भारतीय मिडियाका अनुसार श्रीवास्तवको धम्की दिने अडिओ हालै भाइरल भएको छ । जसमा उनले प्रकृतिलाई धम्क्याएको सुनिन्छ ।

यसअघि प्रकृतिले श्रीवास्तवको बारेमा केआइआइटीको अन्तर्राष्ट्रिय सम्बन्ध कार्यालयमा उजुरी दिएकी थिइन् । तर, उक्त उजुरीमा कुनै सुनुवाइ नभएको विद्यार्थीहरूको गुनासो छ ।

भारतीय प्रहरीले यस घटनामा शंकास्पद व्यक्तिलाई पक्राउ गरेको पुष्टि गर्दै मृतकको परिवारलाई सूचित गरेको जनाएको छ । प्रहरीले घटनाको कारणको बारेमा अनुसन्धान गरिरहेको र थप जानकारी आउने जनाएको छ ।

केआइआइटीले प्रकृतिको मृत्युलाई आत्महत्या भनेर सार्वजनिक सन्देश जारी गरेको छ । यो घटनामा कुनै प्रकारको अन्याय नभएको दाबी गरिएको छ ।

यद्यपि, केआइआइटीको निस्कनको उर्दी र विद्यार्थीहरूको गुनासोले विश्वविद्यालयको भूमिका र लापरवाहीमाथि गम्भीर प्रश्न उठाएका छन् ।