एजेन्सी, २७ माघ । दिल्ली विधानसभा चुनावमा आम आदमी पार्टी (आप) ले ठूलो पराजय भोगेको एक दिनपछि पार्टीका प्रमुख नेतृ आतिशीले दिल्लीको मुख्यमन्त्री पदबाट राजीनामा दिएकी छन् ।

आइतबार बिहान उनले दिल्लीका उपराज्यपाल वीके सक्सेनालाई आफ्नो राजीनामा बुझाएकी थिइन् । सक्सेना निवासमा पुगेर आतिशीले औपचारिक रूपमै पद छोड्ने निर्णय लिईन् ।

आतिशीले राजीनामा बुझाउने निर्णय लिनु आपको हालको चुनावी नतिजासँग सम्बन्धित थियो । पार्टीले आफ्नो ६२ सिटको तुलनामा २२ सिट मात्र जित्न सक्यो । आम आदमी पार्टीको यो परिणामले पार्टीका नेताहरूसँगै दिल्लीका जनताको बीच पनि ठूलो निराशा ल्याएको छ ।

यसै बीच दिल्लीका उपराज्यपाल वीके सक्सेनाले आतिशीलाई नयाँ सरकार गठन नभएसम्म हालको पदमा रहन आग्रह गरेका छन् ।

दिल्ली विधानसभा चुनावमा भारतीय जनता पार्टी (भाजपा) ले ४८ सिट जितेर २७ वर्षपछि पूर्ण बहुमत प्राप्त गरेको छ । यद्यपि, कांग्रेस पार्टीले यस पटक एक पनि सिट जित्न सकेन । यसले आपका लागि ठूलो चुनौती पेश गरेको छ ।

गत वर्षको सेप्टेम्बरमा अरविन्द केजरीवालले आफ्नो मुख्यमन्त्री पदबाट राजीनामा दिएपछि आतिशीलाई दिल्लीको मुख्यमन्त्रीका रूपमा नियुक्त गरिएको थियो । त्यसको ठीक चार महिना पछि पार्टीको पराजय र आतिशीको राजीनामा राजनीतिक परिप्रेक्ष्यमा महत्त्वपूर्ण मोडको रुपमा रहेको छ ।

आतिशीको राजीनामाले दिल्लीको राजनीति र आप पार्टीको भविष्यमा नयाँ सवालहरू उठाएका छन् ।